Шоми дирӯз дар пайи ҳамлаи паҳподии “Ҳизбуллоҳ” ба ошхонаи сарбозони пойгоҳи низомии Гулонӣ дар шимоли Исроил 4 сарбози исроилӣ кушта, дасти кам 67 нафари дигар захмӣ шуданд.
Гуфта мешавад, вазъи саломатии 9 сарбози захмишуда бисёр вахим аст. Ба гузориши расонаҳои исроилӣ, ин пойгоҳи низомӣ дар шаҳри Бинёмино, шимоли Исроил ва тақрибан 65 километр дуртар аз марзи Лубонон воқеъ аст.
Артиши Исроил мегӯяд, сомонаҳои падофанди ҳавоии ин кишвар натавонистанд паҳподи “Ҳизбуллоҳ”-ро шиносоӣ ва раҳгирӣ кунанд. Ва тахмин зада мешавад, ки шояд ба сабаби парвози пасти ин паҳпод шиносоӣ нашудааст. Аммо паҳпод, ки бо худ то 40 кило маводи таркандаро мебардошт, пеш аз мунфаҷир шудан, мушакеро ба сӯи ҳадаф партоб карда буд.
Расонаҳои Исроил мегӯянд, ҳамлаи паҳподии “Ҳизбуллоҳ” ҳамаро ғофилгир кард ва дар замони ҳамла ҳатто ҳеч занги хатаре дар минтақа фаъол нашуда буд.
Ҳамчунин артиши Исроил ин ҳамла паҳподиро яке аз маргбортарин ҳамлаҳо аз оғози ҷанг то кунун донистааст.
Пас аз чанд соати ин ҳамла артиши Исроил ба як бемористон ва як урдугоҳи паноҳандагон дар Ғазза ҳамали шадидеро анҷом дод, ки то кунун 3 нафар ҷон бохта, даҳҳо каси дигар захмӣ шудаанд. Ҳамла боиси оташ гирифтани хаймаҳо ва тамоми ашёи паноҳандагон шудааст.
Дар ин авохир Исроил ҳамалоти худро ҳам ба Лубнон ва ҳам ба Ғазза ва ҳатто ба марзҳои Сурия шиддат бахшидааст.
