Аминҷон Алиаҳмадов, беҳтарин футболбози ҷавони тоҷик дар соли 2021, ҳоло ба муҳоҷирати меҳнатӣ рафта, дар Русия шаурма мефурӯшад.
Бино ба иттилои шабакаи инстаграми “komanda.tj”, Аминҷон Алиаҳмадов, ки соли гузашта беҳтарин футболбози ҷавони лигаи олии Тоҷикистон дониста шуда буд, ҳоло дар муҳоҷирати корӣ дар шаҳри Киржачи вилояти Владимири Русия қарор дорад ва ба фурӯши шаурма машғул аст.
Аминҷон сабаби ба муҳоҷирати корӣ рафтанашро ба дастгирӣ наёфтанаш дар кишвар рабт дода гуфтааст, ки “ҳарчанд ӯ беҳтарин футболбози ҷавони лигаи олӣ эътироф шуда бошад ҳам, лекин дастгирӣ наёфта, пулкоркунӣ рафт”.
Шабакаи инстаграми “komandatj” дар истинод ба Аминҷон менависад, ки “ӯ дар вақтҳои холӣ аз кор ҳамроҳи дӯстонаш футболбозӣ мекунад. Намояндагони дастаи “Ротор”-и Киржач бозии Аминҷонро дида, назди худ даъват карданд. Дар бозии аввалини санҷишӣ Аминҷон 4 гол зада, 2 маротиба муваффақона барои гол задан ба ҳамдастааш тӯб партофт”.
Худи Аминҷон, ки дар гузашта бозигари дастаи “Равшан”-и Кӯлоб буд гуфтааст, ки шояд бо дастаи “Ротор”-и шаҳри Киржач, ки дар мусобиқаи вилояти Владимир бозӣ мекунад, қарордод ба имзо расонад.
Ба муҳоҷирати корӣ рафтани варзишгарони тоҷик ба як амри маъмулӣ табдил ёфтааст. Бештари ин варзишгарон аз сабаби дастгирӣ наёфтан ва надоштани шароити хуб варзишро бо корҳои вазнин дар Русия иваз мекунанд.
Пештар аз ин низ хабари ба муҳоҷирати корӣ рафтани Дилшод Восиев, яке аз футболбозони шинохтаи тоҷик расонаӣ шуда буд, ки баҳсҳои зиёдеро миёни корбарони шабакаҳои иҷтимоӣ ба бор оварда буд.
Ба гуфтаи коршиносон набудани ҷойи кор, маоши хуб ва фасодзада будани тамоми сохторҳои Тоҷикистон, на танҳо варзишгаронро, балки тамоми қишри ҷомеаро маҷбур кардааст, ки барои ёфтани ризқу рӯзӣ ба муҳоҷирати меҳнатӣ раванд.
