Шаби 31-уми октябр ва 1-уми ноябр беш аз 200 муҳоҷир дар фурудгоҳи Домодедовои Маскав дармонданд, дар баробари доштани чиптаи парвоз натовнистанд ба Душанбе парвоз кунанд. Масъулини Вазорати нақлиёт Русияро дар ин маврид, гунаҳкор медонанд, ки дар лаҳзаҳои охир иҷозаи парвоз надодааст.
Муҳоҷирон дар баробари доштани чиптаи парвоз аз фурудгоҳи Домодедово натавонистаанд ба Тоҷикистон парвоз кунанд, гуфта мешуд, ду ҳавопаймои ширкати “Сомон-эйр” мебоист муҳоҷиронро ба Душанбе биоваранд, вале ин ширкат аз ҷониби Русия иҷозаи парвоз дарёфт накардааст.
Муҳоҷирон ба “Азда тв” гуфтанд:
“Мо чунин умед надоштем, ки чанд дақиқа мондан ба парвоз ҳамакор якбора дигар мешаваду иҷоза парвоз намедиҳанд, барои дастарс кардани чипта як моҳ зиёд сарсон будем, вале дар баробари ин боз натавонистем ба Ватан баргардем.”
Дар ҳамин ҳол Радиои Озодӣ аз манбааш дар Вазорати нақлиёти Тоҷикистон навишааст, ки бо Русия музокира ҷараён дошт, вале дар охирин лаҳза навтавонистанд ба мувофиқа расанд.
Дар идома иброз доштааст, ки касе интизор надошт, ки Русия чунин тасмим мегирад, шарти ҷониби Русия барои идомаи парвозҳо ин буд, ки бояд бештар ширкатҳои русӣ муҳоҷиронро ба Тоҷикистон баранд.
“Ширкатҳои Тоҷикистон дар ҳолати бисёр бад қарор доранд. Онҳо шарт гузоштанд, ки аз панҷоҳ дарсад бештар ширкатҳои русӣ ба Тоҷикистон парвоз кунанд. Ин аз чанд ҷиҳат барои Тоҷикистон хуб нест ”,-гуфтааст, манбаи Озодӣ.
Парвозҳои маъмулӣ миёни Тоҷикистон ва Русия аз охири моҳи март қатъ шуда буд, то ба имрӯз танҳо тариқи парвозҳои чартерӣ афроди ниёзмандро аз Русия ба Тоҷикистон оварданд.
Мақомоти Русия дар чанд давра иҷоза дод, ки парвозҳои чартерӣ ба Тоҷикистон сурат гиранд. Бори охир, аз 9-ум то 31-уми октябр барои бозгашти шаҳрвандони Тоҷикистон аз Русия 107 парвози чартерӣ ё ғайринақшавӣ иҷозат шуда буд.
Парвозҳои маъмулӣ миёни Тоҷикистон ва Русия аз 20-ум март инҷониб бинобар хуруҷи пандемияи короновирус қатъ шудаанд. Ба иттилои мақомот, дар ин давра тавассути парвозҳои чартерӣ ҳудуди 70 ҳазор шаҳрванд аз Русия ба Тоҷикистон оварда шуданд.
