Мақомоти Тоҷикистон талош доранд он гурӯҳи ҷавононе, ки ба блогерӣ машғуланд ва наворҳояшон дар Ютуб бинандаи зиёд дорад, ба тарғибгарони сиёсати ҳукумат табдил диҳанд.
Рӯзи 26-уми апрели соли ҷорӣ дар Душанбе Форуми ҷавонон дар мавзӯи “Дарёфти роҳҳо ва абзорҳои истифодаи шабакаҳои иҷтимоӣ ба манфиатҳои миллӣ ва тарғиби арзишҳои давлатдорию давлатсозӣ” баргузор гардид, ки дар он даҳҳо блогери шинохтаи тоҷик ҳузур доштанд.
Намояндагони мақомоти давлатӣ, аз ҷумла аз Кумитаи кор бо ҷавонон ва варзиш, Иттифоқи ҷавонон, Маркази тадқиқоти стратегӣ, Вазорати фарҳанг ва ғайра ширкат ва суханронӣ доштанд.
Мақомоти давлатӣ ҳангоми суханрониҳояшон бештар аз блогерон мехостанд, ки сиёсати ҳукуматро тарғиб намоянд, риш нагузоранд ва духтарҳо либоси миллӣ бипӯшанд.
Абдулло Раҳмонзода, раиси Кумитаи кор бо ҷавонон ва варзиши назди ҳукумати Тоҷикистон дар мавриди риш гузоштани блогерон суханронӣ кард. Ӯ дар масъалаи ин ки чаро мақомоти тоҷик нисбати риши ҷавонон хеле ҳассос ҳастанд, гуфт: “Имрӯз риш ҳамчун омил ё нишона, ё пайғом ба ана ҳамон ақидаҳои хусусияти террористиву экстремистии ҳизбу ҳаракати дар кишвари мо мамнӯи Толибон ҳамингуна қабул мешавад.”
Раиси Кумитаи ҷавонон таъкид кард, ки риш гузоштани ҷавонон дар кишвар пайғом додан ба Толибон аст, ки “мо ақидаи шуморо қабул дорем”. Ӯ ҳамчунин гуфт, ки риш “ба давлатдории миллии мо хатар эҷод мекунад”. Ва аз блогерон хост вақти ҳангоми таҳияи наворҳо дар ин бора аҳмияти ҷиддӣ бидиҳанд.
Дар ин мулоқот намояндагони ҳукумат аз тарзи гуфтору либоспӯшии баъзе блогерон интиқод карданд, вале бештар аз ҳама аз онҳо хостанд, ки “ба афкори гурӯҳҳои ифротӣ дода” нашаванд ва “зиракии сиёсиро” низ аз даст надиҳанд. Ва ҳамчунин таблиғгари масиоли миллӣ ва фарҳангӣ буда, ҳамзамон сиёсати давлатро низ тарғиб кунанд.
Гуфта мешавад, ба ҷуз кишварҳои диктотурӣ, амсоли Тоҷикистону Туркманистон ва ғайра, ҳеч кишвари дигаре фаъолияти блогеронро дар чорчӯби хостаҳои худ надароварда ва онҳоро тарғибгари сиёсати ҳукуматҳояшон накардаанд.
