Дар Дубай нишаста, мардумро бо баҳонаи хариди тилло ва дигар ашёи қиматбаҳо фиреб дода, даҳҳо ҳазор долларро соҳиб шудааст.
Вазорати корҳои дохилии кишвар бо нашри матлабе аз боздошти нафаре хабар дод, ки ба гуфтаи ин ниҳод, дар қаллобӣ бо ҳаҷми калон гумонбар мешавад. Марди гумонбар сокини 39-солаи шаҳри Хуҷанд буда, ҳоло аз ҷониби кормандони пулиси шаҳр дастгир шудааст.
Вазорати корҳои дохилӣ дар шарҳи хабар мегӯяд, гумонбаршаванда, моҳи августи соли 2024, замоне ки дар шаҳри Дубайи Имороти Муттаҳидаи Арабӣ қарор дошт, бо роҳи фиреб аз як ҷавонзани 26-солаи сокини шаҳри Душанбе, бо баҳонаи равнақ додани тиҷорат ва хариди 2-адад бастаи ҷавоҳиротҳои тиллоӣ бо алмос 60 ҳазор доллари амрикоӣ гирифта ваъда додааст, ки ба пурраги маблағҳои гирифтаашро бармегардонад, аммо гумонбаршаванда маблағҳои ба даст овардаашро ба манфиати шахсиаш сарф намудааст.
ВКД нагуфтааст, ки нисбати боздоштшуда мутобиқи кадом моддаи Кодекси ҷиноятии Тоҷикистон парванда боз шудааст, аммо таъкид мешавад, дар робита ба ҳодисаи мазкур тафтишот идома дорад. Вале то ҳанӯз назари шахси гумонбар дар мавриди ин иттиҳом дастрас нест.
