Қурби рубли русӣ дар баробари пули миллӣ сомонӣ тақрибан 4% боло рафтааст.
Имрӯз, 25-уми апрели соли 2022 Бонки миллии Тоҷикистон арзиши рубли русӣ дар баробари пули миллӣ-сомониро 4 дарсад боло бурд ва 1000 рубли русиро баробар ба 160,2 сомонӣ таъйин кард.
Бонки миллии Тоҷикистон арзиши доллари амрикоиро бетағйир боқӣ монда, қурби 1$-ро 12.5075 сомонӣ таъйин кардааст.
Бонки миллии Тоҷикистон, ки таъинкунандаи қурби пули миллӣ-сомонӣ дар баробари арзҳои хориҷӣ дар Тоҷикистон аст, то ҳол дар бораи афзоиши қурби рубл дар баробари сомонӣ изҳори назар накардааст.
Болоравии қурби рубл хонаводаҳои муҳоҷирони кориро шод кардааст, ҳарчанд бисёре аз сокинони Тоҷикистон мегӯянд, ки ба далели боло рафтани қимати маводи ғизоӣ, болоравии қурби рубл чизеро иваз накардааст.
Бино ба иттилои Бонки марказии Русия, муҳоҷирони тоҷик тариқи бонкҳо соли гузашта аз Русия ба Тоҷикистон 1,8 млрд доллар пул равон кардаанд, ки 95%-и он бо рубл фиристода шудааст.
