Ян-Петер Олтерс намояндаи доимии Бонки ҷаҳонӣ (БҶ) дар Тоҷикистон ба Ҳукумати кишвар машварат додааст, ки дар масъалаи коҳиши даромади бахши технологияҳои иттилоотӣ-коммуникатсионӣ ва камшавии шумори муштариён чораҳои муассир андешад.
Ян-Петер Олтерс ин масъаларо рӯзи 14 октябр дар ҷаласаи Шӯрои машваратии назди Президенти Ҷумҳурии Тоҷикистон барои беҳтар кардани фазои сармоягузорӣ иброз доштааст.
Ҷаноби Олтерс гуфтааст: “Дар давраи солҳои 2000-2015 ин соҳа дар ҳоли рушди босуръат қарор дошта, ба рушди иҷтимоӣ ва иқтисодии Тоҷикистон саҳми арзанда мегузошт”.
Дар идома гуфтааст, ба туфайли расмиёти шаффофи дастрасӣ ба иҷозатнома ва боҷҳои пасти он, ба Тоҷикистон муяссар гардид, ки оператори бонуфузи байнулмилалиро ба ин соҳа ҷалб намояд.
Ба гуфтаи намояндаи Бонки ҷаҳонӣ ҳанӯз аввали соли 2015 танзимгар дар соҳаи технологияҳои иттилоотӣ-коммуникатсионӣ изҳор дошта буд, ки суръати афзоиши даромади ин соҳа дар сатҳи 15% боқӣ модааст.
Сари сабабҳои асосии он фикр кардан зарур аст, ки чаро дар ҳошияи иқтисоди дар ҳоли рушд қарордошта солҳои минбаъда даромадҳо дар соҳаи технологияҳои иттилооотӣ-коммуникатсионӣ ва шумори муштариён кам шуд”, – гуфтааст ҷаноби Олтерс.
Ба назари ӯ, бидуни рушди интерети баландсуръат ноил гардидан ба дигаргуниҳои рақамӣ, ҷорисозии хизматрасонии ҳукумати электронӣ ва пешбурди замимаҳои молиявӣ дар платформаҳои мобилӣ ғайриимкон аст.
Дар идома зик кардааст, ки “Бидуни ислоҳоти ҳадафнок, сарфи назар аз дастрасии маҳдуд ва суръати паст, нархҳо дар ин бахши иқтисод яке аз баландтарин дар ҷаҳон боқӣ мемонанд”.
Гуфта мешавад, даромади операторони хусусӣ тайи солҳои охир мунтазам коҳиш ёфтааст. Дар соли соли 2019 даромади онҳо қариб 5 млн сомонӣ кам шуда, андаке бештар аз 2,4 млрд сомониро ташкил додааст.
Айни ҳол дар бозори алоқаи мобилии Тоҷикистон чаҳор ширкати мобилӣ ҶСП «Индиго Тоҷикистон» (Tcell), ҶСП «ТТ-Мобайл» (МегаФон Тоҷикистон), ҶСП «Вавилон Мобайл» ва ҶДММ «Таком» (ZetMobile, собиқ Beeline) фаъолият мекунанд.
