Дар шаҳри Душанбе байни Вазорати молияи Тоҷикистон ва намояндагони Бонки ҷаҳонӣ Созишномаи маблағгузории наздик ба 50 миллон долларӣ ба имзо расид.
Ба иттилои дафтари матбуоти Вазорати молияи Тоҷикистон 3-уми октябри соли 2022 дар ин вазорат “Созишнома оиди маблағгузорӣ байни Ҷумҳурии Тоҷикистон ва Ассотсиатсияи Байналмилалии Рушд ва Созишномаи грантӣ байни Ҷумҳурии Тоҷикистон ва Бонки Байналмилалии Таҷдид ва Рушд ва Ассотсиатсияи Байналмилалии Рушд ба имзо расонида шуданд.”
Дар маросими имзогузории ин созишномаҳо вазири молияи кишвар, Қаҳҳорзода Файзиддин Саттор ва намояндаи доимии Бонки ҷаҳонӣ дар Тоҷикистон, Озан Севимлӣ ширкат карданд.
Гуфта мешавад, ҳадаф аз ин лоиҳаи пешниҳод намудаи Тоҷикистон “баланд бардоштани устувории роҳҳои муҳими автомобилгард ва пурзӯр намудани иқтидорҳо вобаста ба идоракунии хатари офатҳои табиӣ мебошад.”
“Арзиши умумии Лоиҳа 47,34 млн доллари амрикоиро ташкил дода, аз он 30,0 млн доллар гранти Ассотсиатсияи Байналмилалии Рушд (бо эквиваленти 22,4 млн ҳуқуқи махсуси қарзгирӣ) ва 17,34 млн доллар гранти Фонди ягонаи донории трастии Барномаи шарикии Иттиҳоди Аврупо ва Бонки Умумиҷаҳонӣ, Қисми III барои кишварҳои Аврупо ва Осиёи Марказӣ (бо эквиваленти 16,19 млн евро) мебошад.”, таъкид мешавад дар хабар.
Гуфтанист, лоиҳаи мазкур соли 2023 оғоз ёфта, анҷоми он соли 2027 ба нақша гирифта шудааст.
