Кумитаи ҳолатҳои фавқулодда ва мудофиаи граждании назди Ҳукумати Тоҷикистон рӯзи 29-уми август хабар дод, ки рӯзи гузашта кормандони ин ниҳод боз ҷасади 4 нафари дигарро дар шаҳри Ваҳдат пайдо карданд.
Тибқи иттилои расмии Кумитаи ҳолатҳои фавқулоддаи кишвар, ҷасадҳои пайдошуда 3 нафарашон зан ва як нафари дигар мард будааст. Мақомот рӯзи гузашта шумори қурбониёни селу обхезиҳои кишварро 13 нафар эълон карда буданд, ҳоло ин шумор ба 17 нафар расид.
Гуфта мешавад, ҳангоми бартараф сохтани оқибатҳои офати табиӣ дар ҳудуди ҷамоати деҳоти Нуъмон Розиқ, Симиганҷ, Чӯянгарон ва Ромити шаҳри Ваҳдат ин ҷасадҳо пайдо шуда, барои муайян сохтани шахсияти онҳо ба мақомоти дахлдор супорида шудаанд. То ҳол маълум нашудааст ин ҷасадҳо сокинони кадом деҳа ҳастанд.
Кумитаи ҳолатҳои фавқулодда мегӯяд, дар корҳои бартарафсозии оқибатҳои сел 350 нафар аз сокинони маҳаллии ҷамоатҳои Нуъмон Розиқ, Симиганҷ, Чӯянгарон ва Ромити шаҳри Ваҳдат ширкат карда, ба онҳо кумак расонданд. Ва то ҳол дар умум дар ҷамоатҳои мазкур 25 бинои истиқоматӣ аз лою лойоба пок карда шуданд.
Мақомоти кишвар то ҳанӯз омори ягонаи хисороти воридшуда аз ин селу обхезиҳои ахири кишварро нашр накардаанд. Наворҳое, ки дар шабакаҳои иҷтимоӣ роҳ ёфтанд, дида мешавад, ки бар асари ин боришоти ахир на танҳо хонаҳо, балки бузургроҳҳои кишвра аз Душанбе то Рашту Лахш ва нуқтаҳои алоҳидаи шоҳроҳи Душанбе-Чаноқ низ осеб дидаанд.
Ёдовар мешавем, ки шаби 27-уми августи соли ҷорӣ дар аксар минтақаҳои кишвар борони шадиде борид. Бар асари ин боришоти сахт дар шаҳрҳои Душанбе, Ваҳдат, Ҳисор ва ноҳияи Рӯдакӣ обхезиҳои сахте рух дод, ки ҷони 17 нафарро гирифту чандин хонаву роҳҳоро вайрон кард.
