Нисбати як корманди Корхонаи давлатии фаръии “Бақайдгирии молу мулки ғайриманқул” дар шаҳри Истаравшан бо иттиҳоми қаллобӣ ва фиреби мардум парванда боз шудааст.
Бино ба иттилои Агентии назорати давлатии молиявӣ ва мубориза бо коррупсияи Тоҷикистон, Пулотов Музаффар Маъмурович, ки ба ҳайси мутахассиси шуъбаи барӯйхатгирии техникии Корхонаи давлатии фаръии “Бақайдгирии молу мулки ғайриманқул” дар шаҳри Истаравшан кор мекард, барои тартиб додани ҳуҷҷатҳои хона аз як шаҳрванди ҳамин шаҳр маблағи зиёде ҳамчун пора гирифта, ба манфиати шахсияш сарф кардааст.
Дар хабари Агентӣ гуфта мешавад, ки Пулотов “зимни фаъолияти кориаш аз шаҳрванд “А” барои мусоидат намудан, ҷиҳати гирифтани шаҳодатномаи истифодабарии замин ва гирифтани шаҳодатномаи қонунигардонии дороиҳо ба манзили номбурда маблағи 33000 сомониро бо роҳи фиреб гирифта, тасарруф намуда, ба охирин зарари калони моддӣ расонидааст.”
Аз ҷониби Агентии зидди фасоди Тоҷикистон нисбати Пулотов Музаффар бо моддаи 247 қисми 3 банди “а” Кодекси ҷиноятии Ҷумҳурии Тоҷикистон парвандаи ҷиноятӣ оғоз карда, аллакай таҳқиқи парванда ба охир расида ва он ба додгоҳ фиристода шудааст.
Масъалаи порагирӣ ва фасод дар байни кормандони давлатӣ дар Тоҷикистон яке аз мушкилотест, ки рӯз то рӯз рушд меёбад. То ҳол Ҳукумат бо барномаҳои давлатияш натавониста пеши роҳи фасодзадагии мақомот, бахусус идораҳои марбут ба тақсими замину молиётро бигирад.
