Шаби гузашта дар сарҳади Тоҷикистону Қирғизистон тирпарронӣ ба амал омада як шаҳрванди Қирғизистон захмӣ шуда ва ҳоло дар бемористон бистарӣ шудааст.
Бино ба иттилои хабаргузории “Sputnik” шаби гузашта дар сарҳади Тоҷикистону Қирғизистон тирпарронӣ сурат гирифтааст. Мақомоти қирғиз гуфтаанд, ки афроди номаълум аз сӯи Тоҷикистон ба ҷониби як шаҳрванди Қирғизистон оташ кушодаанд. Нерӯҳои марзбонии Тоҷикистон то ба ҳол қазияро шарҳ надодаанд.
Гуфта мешавад, тирпарронӣ соати 01:30 дақиқа дар деҳаи Эки — Таши вилояти Бодканд рух додааст. Афроди номаълум аз ҷониби Тоҷикистон ба сӯйи шаҳрванди 38 — солаи Қирғизистон оташ кушоданд ва ӯро маҷрӯҳ намуданд.
Хадамоти марзбонии Қирғизистон гуфтааст, ронандае, ки ба самти Ош — Исфара ҳаракат дошт аз тири милтиқи шикорӣ ҷароҳати сабук бардоштааст ва феълан дар беморхонаи Самарқандак бистарӣ мебошад.
Дар ҳамин ҳол, шаби гузашта мулоқоти намояндагони пулиси ду кишвар баргузор шуд ва феълан низ гуфтушуниди ҳар ду ҷониб идома дорад. Хабаргузории “Spuptnik” аз қавли манбааш навиштааст, ки айни замон вазъият дар марз мӯътадил аст. Қаблан, маркази матбуоти Қӯшунҳои сарҳадии Кумитаи давлатии амнияти миллии Тоҷикистон хабар дод, ки соати 11:55-и 27 майи соли 2020 бархилофи созишномаҳои қаблан баимзорасида, шаҳрванди Қирғизистон Бахтибеков Соат, сокини деҳаи Куктоши ҷамоати деҳоти Оқсой ба сӯйи ҷавонзани 25-сола, шаҳрванди Тоҷикистон тир холӣ кард.
Манбаъ аз шаҳрванди тирхӯрдаи Тоҷикистон, Шаропова Шукрона Зуҳурбоевна (Муътабархонум Зухриддин), соли таваллудаш 1995, истиқоматкунандаи маҳаллаи Қақири Ҷамоати деҳоти Чоркӯҳ ва коргари бригадаи №14-уми тухмипарварии ҳамин маҳалла ном бурд. Шаропова аз қисмати рости баданаш захмӣ шуда буд.
Нооромиҳо дар сарҳади байни Тоҷикистон ва Қирғизистон аз чанд сол ба ин сӯ идома дорад. Дар ин нооромӣ тарафҳо айбро бар души ҳамдигар мегузоранд. Ахиран гурӯҳи корбарони шабакаҳои иҷтимои бо номи “Ахбори Тоҷикистон ва ҷаҳон”, ки гуфта мешавад ба мақомоти амниятии Тоҷикистон марбут аст, Сооронбей Ҷеенбеков, раиси ҷумҳурии Қирғизистонро дар даргириҳо ва таниш дар марз муттаҳам кард.
Дар як матлаби ахири ВЕСТИ-Қиргизистан муовини пешини вазорати дифои Қирғизистон Эмомалӣ Раҳмонро сабабгори нооромӣ дар марзи байни ду кишвар хонда ва афзудааст, напазируфтани нақши миёнаравии Русия аз тарафи Раҳмон мойил набудани ӯ ба рафъи ихтилоф ва тавофуқи ду кишвар бар сари марзро шаҳодат медиҳад.
