Дафтари матбуоти Агентии давлатии молиявӣ ва мубориза бо коррупсия Ҷумҳурии Тоҷикистон дар сомонаи расмиаш аз боздошти Ҳакимов Ҳакимхон Ваҳобович дар вазифаи техник-заминсози Корхонаи давлатии фаръии “Суғдзаминсоз” ва Раҳимов Ҳакимҷон Садриддинович хабар додааст.
Гуфта мешавад, ин кормандони “Суғдзаминсоз” ба боварии шаҳрванд Раупов Акрам Расулович даромада, барои аз ҳудуди заминҳои маҳаллаи 8-уми шаҳри Хуҷанд ҷудо карда додани қитъаи замин аз охирин маблағи 206.150 сомонӣ талаб карда гирифта онро ба фоидаи худ тасарруф намудаанд.
Дар хабар омада, ки нисбати Ҳакимов Ҳ.В. ва Раҳимов Ҳ.С. бо моддаи 247 қисми 4 банди “б” Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, он баъди анҷоми тафтиши пешакӣ барои моҳиятан баррасӣ намудан ба суд ирсол карда шуд.
Ба назари коршиносон боздошт ва зиндонӣ кардани баъзе кормандони ҳукумату ҷамоатҳо бо иттиҳоми даст доштан дар фасод ва ё ғайриқонунӣ фурӯхтани замин, сабаби ба куллӣ решакан кардани фасод дар кишвар шуда наметавонад. Чуноне, ки медонем, тақрибан ҳар ҳафта ва ҳар моҳ чанд мансабдор бо чунин иттиҳомот дастгир мешаванд, вале сатҳи паст шудани ришваситонӣ ба чашм намерасад. Мушкилии асосиро огоҳони умур дар фасодзада будани тамоми сохторҳо ва масъулони калидии кишвар медонанд, на дар кормандони поёнӣ.
