Дафтари матбуотии Хадамоти марзбонии Қирғизистон хабар дод, ки дар наздикии шоҳроҳи Хуҷанд-Конибодом марзбонони ин кишвар мошини Mercedes-Sprinter-ро бо рақамҳои тоҷикӣ пайдо карданд, ки ғайриқонунӣ ба қаламрави Ҷумҳурии Қирғизистон ворид шудааст.
Гуфта мешавад, ки ронанда ва ҳамроҳаш шаҳрвандони Тоҷикистон буда, ба талаби марзбонон итоат накарда, аз худрав нахостанд пиёда шаванд ва талош доштанд ба хоки Тоҷикистон гузаранд, вале марзбонони қирғиз онҳоро боздошт кардаанд.
Ба навиштаи сомонаи хадамоти марзбонӣ, ҳангоми азназаргузаронии мошин аз бордони он 4 тонна мандарин дарёфт гардидааст, ки шаҳрвандони Тоҷикистон қасд доштаанд ғариқонунӣ онро ба Тоҷикистон интиқол диҳанд. Арзиши тахминии борҳои қочоқӣ тақрибан 300,000 сом (муодили беш аз 3,5 ҳазор долар)-ро дарбар мегирад.
Вале аз боздоштшудаҳо ном бурда нашудааст, танҳо соли таваллуди онҳо гуфта шудааст, ки яке мутаваллиди соли 1990 ва дигарӣ соли 1986 мебошад.
Нисбати боздоштшудагон парвандаи ҷиноятӣ боз шуда барои тафтишоти иловагӣ ба кормандони мақомоти салоҳиятдор супорида шуданд.
То ҳол назари мақомоти тоҷик дар барои ин боздоштшудаҳо нашр нашудааст ва ҳувияти онҳову аз кадом минтақаи Тоҷикистон буданашон низ номаълум аст.
