Эмомалӣ Холов, ҳамкори пешини Иззат Амон бо дархости мақомоти Тоҷикистон дар Русия боздошт шуда ва эҳтимол ба Душанбе истирдод мешавад.
Бино ба гузориши Радиои Озодӣ, Эмомалӣ Холови 30-сола, ки дар гузашта дар “Маркази тоҷикон” ба ҳайси ихтиёрӣ кор мекард ва ба муҳоҷирон кумак мерасонд. Шуъбаи корҳои дохилӣ дар ноҳияи Данғара аз моҳи марти соли 2021 ӯро ба гумони “тундгароӣ” дар ҷустуҷӯ қарор додааст.
Пайвандон ва наздикони Холов мегӯянд, кормандони пулис ӯро рӯзи 26-уми майи соли ҷорӣ дар истгоҳи мусофирбарҳо дар Горшеченскийи вилояти Курски Русия дастгир кардаанд. Беш аз як моҳ мешавад, ки Эмомалӣ дар боздоштгоҳ қарор дорад ва то ҳол ояндаи ӯ маълум нест.
Дилором Боймуҳаммедова, ҳамсари Эмомалӣ Холов дар суҳбат бо Радиои Озодӣ гуфтааст, ки чанд фарзандашон шаҳрвандии Русияро доранд ва аз номи онҳо ба мақомоти тафтишотӣ муроҷиат мекунанд, то ӯро ба Тоҷикистон истирдод накунанд.
Ба гуфтаи хонум Боймуҳаммедова шавҳараш ҳеч гуноҳ накардааст, танҳо ба муҳоҷирон ёрӣ додааст. Пайвандони вай меафзоянд, дар сурати истирдоди Эмомалӣ ба Душанбе, ӯро шиканҷа ва ҳукми тӯлонии зиндон таҳдид мекунад.
Ин бори аввал нест, ки аз фишору боздошти ҳамкорони Иззат Амон хабарҳо нашр мешавад. Пештар Муҳаммадхон Эгамов, яке аз ҳамкорони собиқи Иззат Амон, дар Русия дастгир шуда буд ва Бахтовар Ҷумъаев, Сӯҳроби Ҷаҳон ва Ҳусейн Ишанқулов аз афзоиши фишор ба худу наздиконашон дар дохили кишвар шикоят карда буданд.
Иззат Амон, ҳомии шинохтаи ҳуқуқи муҳоҷирони тоҷик дар Русия баҳори соли 2021 бо баҳонаи риоя накардани қоидаҳои будубош ва аз роҳи ғайриқонунӣ ба даст овардани мақоми шаҳрвандии он кишвар аз Русия ба Тоҷикистон ихроҷ ва дар шаҳри Душанбе боздошт шуд.
Мақомоти Тоҷикистон сабаби боздошти ӯро қаллобӣ гуфта, алайҳи ӯ парванда сохта, дар умум ба муҳлати 15 сол равонаи зиндонаш карданд.
Тарафдоронаш ӯро бегуноҳ мешуморанд ва мегӯянд, парвандаи Иззат Амон сиёсист ва ӯ барои танқидҳои ошкораш аз ҳукумат ва раҳбарони Тоҷикистон ба зиндон андохта шудааст.
