Мақомоти қудратии Тоҷикистон соҳибкор ва собиқ мансабдори маҳаллӣ аз шаҳри Хоруғи Бадахшон Тоҳир Абдолбековро боздошт карданд.
Бино ба иттилои манобеи Pamir Daily News, Абдолбеков ба он муттаҳам мешавад, ки дар рафти эътирозҳои моҳи ноябри соли 2021 дар Вилояти Мухтори Кӯҳистон Бадахшон ба тазоҳуркунандагон ғизои ройгон додааст.
Гуфта мешавад Тоҳир Абдолбеков бародари Улфатшо Абдолбеков, собиқ раиси шаҳри Хоруғ буда, дар гузашта роҳбарияти хоҷагии манзилию коммуналиро бар уҳда доштааст. Вақтҳои охир ба тиҷорат машғул буда, чанд мағозаву қаҳвахона доштааст.
То ҳол маълум нест, ки ӯ кай ва аз ҷониби кадом ниҳоди қудратӣ боздошт шудааст. Аммо ба навиштаи манбаъ як рӯз пас аз боздошти Абдолбеков афроди номаълум ба қаҳвахонаҳову мағозаҳои ӯ омада, ҳамаро холӣ кардаанд.
Мақомот то ҳол ин қазияро, мисли боздошту рабуда шудани даҳҳо зодаи Бадахшон аз Русия, шарҳ надодаанд.
Баъд аз ҳодисаҳои ахир дар Бадахшон мақомот фишор болои сокинони ин вилоятро бештар карда, даҳҳо нафарро боздошт ва барои солҳои тӯлонӣ равонаи зиндон кардаанд, ки боиси нигаронии созмонҳои ҷаҳонӣ гаштааст.
