Агентии назорати давлатии молявӣ ва мубориза бо коррупсияи Тоҷикистон аз боздошти Асоев Искандар Сайдуллоевич нозири гурӯҳи назорати давлатии зидди сӯхтори ВКД Ҷумҳурии Тоҷикистон хабар дод.
Ба иттилои дафтари матбуотии ин ниҳод, Асоев Искандар Сайдуллоевич бо истифодаи мақоми хизматӣ бо роҳи фиреб ба боварии шаҳрванд “А” даромада барои ӯро ба Донишкадаи ҳарбии Вазорати мудофиаи Ҷумҳурии Тоҷикистон дохил намудан аз ӯ 18.000 сомонӣ маблағ талаб кардааст.
Дар идома гуфта мешавад, “санаи 22 июли соли 2020 дар натиҷаи гузаронидани чорабиниҳои оперативӣ-тафтишотӣ Асоев И.С. баъди аз шаҳрванд “А” гирифтани маблағи 18000 сомонӣ дастгир гардида, маблағи мазкур аз ӯ ҳамчун далели шайъӣ дарёфт ва гирифта шудааст”.
Нисбати Асоев И.С. бо моддаи 247 қисми 2 бандҳои “в,г” Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, он баъди анҷоми тафтиши пешакӣ барои баррасӣ намудан ба суд фиристода шудааст.
