Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз боздошти як корманди Вазорати корҳои дохила бо иттиҳоми қаллобӣ хабар дод.
Дар як ҳафтаи сипаригардида ин дуввумин корманди сохторҳои қудратист, ки бо чунин иттиҳом дастгир мешавад.
Бино ба иттилои сомонаи Агентии зидди фасод ваколатдори калони оперативӣ оид ба корҳои махсусан муҳими Шуъбаи мубориза бар зидди гардиши ғайриқонунии маводи мухаддири РВКД дар вилояти Хатлон, Холов Шерафган Шералиевич бо истифодаи мақоми хизматӣ, бо роҳи қаллобӣ тасарруф намудани молу мулки ғайр, моҳи январи соли 2020 аз шаҳрванд Сафаров Ф.С. маблағи 8000 доллари амрикоӣ талаб намуда, онро тавассути шаҳрванд Баротов М.Т. гирифтааст.
Гуфта мешавад, Холов Шерафган ин маблағро ба хотири аз тафтиши пешакӣ озод кардани писари Сафаров Ф.С, – Сафаров А.Ф., ки нисбаташ парвандаи ҷиноятӣ боз шуда буду мавриди тафтиши пешакӣ қарор дошт, татбиқ намудани чораи пешгирӣ дар намуди забонхат дар бораи тарк накардани маҳалли истиқомат, мегирад.
Дар идома гуфта шудааст, ки Холов Шерафган Шералиевич инчунин бори дуввум моҳи апрели соли 2020 аз шаҳрванд Сафаров Ф.С. барои дар доираи парвандаи ҷиноятии дар суди вилояти Хатлон қарордошта, таъйин намудани ҷазои ҷарима нисбати писараш-Сафаров А.Ф. боз маблағи 2000 доллари амрикоӣ талаб намуда, аз худ кардааст. Вале то ҳол назари боздоштшуда ва наздиконаш дар ин маврид дастрас нест.
Нисбати Холов Ш.Ш. бо моддаи 247 қисми 4 банди “б” Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, он баъди анҷоми тафтиши пешакӣ барои баррасӣ ба суд ирсол карда шудааст.
