Як масъули шуъбаи кофтукови ҷиноии ШКВД дар ноҳияи Шамсиддини Шоҳин (собиқ ноҳияи Шӯробод) бо иттиҳоми гирифтани пора барои оғоз накардани парвандаи ҷиноятӣ боздошт шуд.
Аз ин мансабдори баландмақоми ноҳияи мазкур Комилов Умед Одинаевич номбурда мешавад, ки ӯ бо истифодаи мақомаш аз шаҳрванд “А” барои гӯё нисбаташ оғоз накардани парвандаи ҷиноятӣ маблағи 10000 сомонӣ талаб намуда гирифтааст.
Комилов баъд аз гирифтани пора аз ҷониби маъмурони Агентии назорати давлатии молиявӣ ва мубориза бо коррупсия боздошт мегардад.
Ба иттилои Агентӣ, айни замон парвандаи ин команди баландпоя, ки бо моддаи 247 қисми 3 банди “а” КҶ Ҷумҳурии Тоҷикистон таҳқиқ мешуд, ба анҷом расида, он барои ҳукми ниҳоӣ ба додгоҳ фиристода шудааст.
Дар ҳолати тасдиқи ҷиноят Комиловро аз 5 то 8 соли зиндон бо маҳрум сохтан аз ҳуқуқи ишғоли мансабҳои давлатӣ ба муҳлати то панҷ сол интизор аст.
Реша давондани фасод дар байни кормандаони давлатӣ, хусусан дар сохторҳои қудратии Тоҷикистон ба як падидаи нооилоҷ табдил ёфтааст. Бо вуҷуди ташдиди қавонини ҷазо нисбати ришвахорон, боз ҳам солона даҳҳо корманди баландмақом, ҳатто аз худи Агентии зидди фасод бо ҷурми порагирӣ боздошт мешаванд.
