Соҷида Саидмуродова, модари Дилшод Саидмуродов, маъруф ба Дилшоди “СБ” ё “красавчик” аз ҷониби Раёсати мубориза бо ҷиноятҳои созмонёфтаи Вазорати корҳои дохилаи кишвар боздошт шудааст.
Бино ба иттилои Радиои Озодӣ, Соҷида Саидмуроваи 64-сола, ки ҷое кор намекард ва бознишаста аст, бо иттиҳоми “авбошӣ” рӯзи 30-уми август боздошт шудааст. Мақомот то ҳол ин хабарро шарҳ надодаанд ва маълум нест Саидмуродава дар куҷо ва кай даст ба авбошӣ задааст.
Ин бори аввал нест, ки дар қазияи Шуҳрат Исматуллоев, мақомот модари гумонбаронро боздошт мекунанд. Пештар аз ин Радиои Озодӣ аз боздошти модари Акбар Аҳмедов хабар дода буд.
Бино ба иттилои манбаъ, мақомот аввали моҳи август модари Ахмедовро дастгир карда, ба боздоштгоҳ бурдаанд ва барои фишор ба писараш чанд муддат онҷо нигоҳ доштанд.
Акбар Ахмедов миёнаҳои моҳи август ночор аз Маскав ба Душанбе бармегард ва худро ба мақомоти интизомӣ таслим мекунад. Аммо чанд рӯз баъд аз боздошташ ҳангоми бозпурсӣ дар натиҷаи шиканҷа ва латтукӯби бераҳмонаи кормандони мақомот дар боздоштгоҳ мефавтад ва ӯро пинҳонӣ дар зодгоҳаш ба хок месупурданд.
Мақомот мисли ҳамеша чунин ҳодисаҳоро шарҳ намедиҳад. Аммо Дилшод Саидмуродов ва Акбар Ахмедов аз гумонбарони қатли муовини раиси “Ориёнбонк” Шуҳрат Исматуллоев ба шумор мераванд. Онҳо баъд аз нопадид шудани Исматуллоев ба Русия фирор карда буданд.
Ёдовар мешавем, ки вазири корҳои дохилии Тоҷикистон Рамазон Раҳимзода рӯзи 28-уми август ба Русия сафар кард ва яке аз ҳадафҳои ин сафар боздошту ба ватан баргардондани Дилшод Саидмуродов гуфта мешуд.
Вазири корҳои дохилии Русия Владимир Колоколтсев зимни мулоқот бо ҳамтои тоҷикистонияш хабар дода буд, ки ду гумонбар дар қатли Шуҳрат Исматуллоевро дар ҳудуди Федератсияи Русия боздошт кардаанд. Эҳтимол мерафт, ки боздоштшудаҳо Дилшод Саидмуродов, раҳбари ин гурӯҳ ва Акбар Ахмедов бошанд. Аммо дертар хабари марги Ахмедов дар пайи шиканҷаи бераҳмона расонаӣ шуд. Инчунин дақиқ нест, ки Дилшод Саидмуродов боздошт шудааст ё не.
Бино ба иттилои мақомот, Шуҳрат Исматуллоев, муовини Ҳасан Асадуллозода 23-юми июни соли ҷорӣ рабуда шуда, дар натиҷаи шиканҷа ҷон додааст. Ҷасади ӯро нимаи аввали моҳи август дар минтақаи Саразми Панҷакент пайдо карда, 30-юми август дар Душанбе ба хок супориданд.
То ҳол мақомот бо гумони даст доштан дар қатли Исматуллоев 13 нафарро боздошт кардааст, ки номи баъзеи онҳо расонаӣ нашудааст. Инчунин яке аз гумонбарон дар қатли Исматуллоев, бо номи Рустам Ашӯров, собиқ корманди ВКД дар пайи як тирпаронӣ дар Фурӯдгоҳи Кишинёви Молдова ҷароҳати вазнин бардошта, дар бемористон фавтид.
