Раёсати Вазорати корҳои дохилӣ дар Душанбе аз боздошти Додихудо Шарифзода, роҳбари ташкилоти “Маркази рушди зеҳнӣ” ва собиқ муовини гурӯҳи “Авангард” бо иттиҳоми “таҷовуз ба номуси як духтари ноболиғ” хабар дод.
Бино ба навиштаи ин ниҳод, Додихудои 24-сола аз моҳи ноябри соли 2024 то ин ҷониб бо як духтари ҳанӯз ба синни шонздаҳсолагӣ нарасида, алоқаи ҷинсӣ ва дигар ҳаракати дорои хусусияти шаҳвонидоштаро анҷом медодааст.
Инчунин ӯ нисбати боз 3 нафар ноболиғ ва занони дигар ҳаракатҳои бадахлоқонаро анҷом додааст.
Ҳоло ин мубаллиғи Ҳукумати Тоҷикистон дар ҳабси пешакӣ қарор дошта, нисбаташ бо иттиҳоми “алоқаи ҷинсӣ бо ноболиғ” (моддаи 141 КҶ) парванда боз шудааст, ки ин банди қонун ҷазо аз 2 то 5 соли зиндон ва маҳрум кардан аз ҳуқуқи ишғоли мансабҳои муайянро пешбинӣ мекунад.
Назари худи боздоштшуда ва вакили дифоу пайвандонаш дар ин бора дастрас нест.
Раёсати ВКД дар Душанбе дар ҳоле аз боздошти раҳбари “Маркази рушди зеҳнӣ” Додихудо Шарифзода хабар медиҳад, ки ин марказ ба раҳбари ВКД дар Душанбе генерал Шоҳрух Саидзода ҷоизаи “100 чеҳраи муваффақ”-ро дода буд.
Инчунин Додихудо дар гузашта муовини гурӯҳи “Авангард”-и вобаста ба ВКД-и кишвар буд. Ин гурӯҳ асосан аз ҷавонон иборат буда, ба таблиғи ташвиқи режими Эмомалӣ Раҳмон ва танқиду таҳқири мухолифон машғул буданд.
