Раиси шуъбаи Кумитаи давлатии амнияти миллии ноҳияи Ҳамадонӣ ҳамроҳи муовин ва як корманди ин ниҳод боздошт шудаанд.
Ба навиштаи сомонаи “Бомдод” ин се тан ба ҳангоми гирифтани маблағи калон аз як соҳибкор ҳамчун пора боздошт гардиданд.
Ба гуфтаи манбаи “Бомдод” боздошти ин 3 корманди КДАМ аз ҷониби СБ, яъне амнияти худи КДАМ сурат гирифта ва ҳоло дар ҳабси пешакӣ қарор доранд ва аз мақомҳояшон бо ҷурми “паст задани шаъну эътибори корманди КДАМ” барканор шудаанд.
Барои чӣ кори мушаххасе аз сохибкор пул талаб кардани ин се мақоми амниятӣ ҳанӯз равшан нест. Вале сухан дар мавриди маблағи бузург меравад. Онҳоро як ҳафта пеш боздошт кардаанд,- гуфт ҳамсуҳбати “Бомдод”.
Ҳамсуҳбати “Бомдод” афзуда, ки ин се афсари боздоштшударо ба шаҳри Кӯлоб бурдаанд, вале маълум нест, ки онҳо дар боздоштгоҳи Кӯлоб қарор доранд ва ё ба Душанбе бурда шудаанд.
Ба гуфтаи манба раиси шуъба аз Суғд буда муовин ва корманди қатории боздоштшуда аз Ванҷ ва Кӯлоб ҳастанд.
Мақомоти КДАМ то кунун хабари боздошти 3 афсари ин ниҳодро шарҳ надодаанд.
