Вазорати корҳои дохилаи Тоҷикистон аз боздошт ва кушода шудани парванда нисбати раиси ҷамоати деҳоти Тоҷикободи ноҳияи Вахш хабар дод.
Бино ба иттилои ВКД раиси ҷамоат 56 сол дошта, дар ғайриқонунӣ додани қитъаи замин ва қаллобӣ дар ҳаҷми калон гунаҳкор дониста мешавад.
ВКД менависад, раиси ҷамоат соли 2015 бо маслиҳати пешакӣ бо як сокини дигари ҷамоати деҳоти Тоҷикобод бо роҳи фиреб ба боварии марди 56-солаи сокини ҷамоати деҳоти 20-солагии Истиқлолияти Тоҷикистони ҳамин ноҳия даромада, аз ӯ 3 ҳазору 600 доллари амрикоӣ гирифтаанд. Дар ивази ин миқдор маблағ аз заминҳои корами обӣ дар ҷамоати деҳоти Тоҷикобод, 0,08 га қитъаи заминро ҳамчун замини наздиҳавлигӣ додаанд.
Нисбати гумонбаршаванда парвандаи ҷиноятӣ бо моддаҳои 247 қисми 3 ва 338 иловаи-1 қисми 2 Кодекси ҷиноятии Ҷумҳурии Тоҷикистон оғоз карда шуда, тафтишот идома дорад.
То ҳол назари айбдоршаванда ва наздиконаш дар хусуси ин қазия маълум нест.
Боздошти ин корманди ҷамоат дар ҳолест, ки солҳои ахир ҳолатҳои ришваситонӣ, қаллобӣ ва ғайриқонуни додани замин зиёд дида мешавад. Худи Эмомалӣ Раҳмон дар яке аз сӯҳбатҳояш заминфурӯшии мансабдоронро “дарди бедаво” номида буд.
