Пулиси Олмон дар марз бо Лаҳистон 3 шаҳрванди Тоҷикистонро, ки ғайриқонунӣ вориди ин кишвар шудаанд, боздошт кардааст.
Расонаҳои русӣ дар истинод ба мақомоти интизомии Олмон хабар медиҳанд, ки рӯзи 7-уми августи соли ҷорӣ ду мошин бо рақамҳои лаҳистонӣ дар минтақаи “Frankfurt an der Oder” як зан ва ду марди аз 24 то 30-солаи эрониро фаровардаанд, ки бо визаи Русия ба ин кишвар омадаанд.
Баъдан дар ҳамин минтақа пулиси Олмон 6 марди аз 22 то 37-солаи зодагони Тоҷикистону Ироқро, ки ғайриқонунӣ вориди ин кишвар шудаанд, боздошт кардааст.
Дар робита ба ин ҳодиса, як марди 29-сола аз Гурҷистон боздошт шуда, нисбати ӯ барои қочоқи шаҳрвандони хориҷӣ тафтишоти пешакӣ оғоз шудааст. Ҷустуҷӯи мошини дуюми қочоқбари эҳтимолӣ бенатиҷа анҷом ёфтааст.
Боздоштшудагон дар Олмон дархости паноҳандагӣ додаанд ва ба қабулгоҳи ибтидоии “Бранденбург” фиристода шудаанд.
Ҳувияти зодагони Тоҷикистон ба расонаҳо маълум нест, аммо моҳҳои ахир хабар дар бораи убури ғайриқонунии марз аз ҷониби шаҳрвандони Тоҷикистон бисёр расонаӣ мешавад.
