Кормандони мақомоти корҳои дохилӣ собиқ вазири корҳои хориҷиро дар манзиле дар пойтахт боздошт карда бо худ бурданд.
Бино ба иттилои расонаҳо, Шоҳ Маҳмуд Қурайшӣ, собиқ вазири корҳои хориҷии Покистон пеш аз боздошти худ бо нашри наворе гуфта, ки чанд нафар аз нерӯҳои интизомӣ барои боздошти вай омадаанд, ва ин “як раванди озодӣ дониста мешавад.”
Боздошти собиқ вазири корҳои хориҷӣ ва яке аз раҳбарони Ҳизби Таҳрики Инсофи Покистон дар ҳоле сурат гирифта, ки боздошти Имрон Хон, собиқ Нахуствазири Покиситон мавҷи эътирозҳои густурдаеро дар сар то сари ин кишвар ба вуҷуд овардааст.
Гуфта мешавад, пас аз боздошти Имрон Хон, раҳбари Ҳизби Таҳрики Инсофи Покистон зуҳри 9-уми май ва боздошти собиқ вазири корҳои хориҷии ин кишвар ҳам субҳи 10-уми ҳамин моҳ дар пойтахти ин кишвар, шаҳри Исломобод сурат гирифтааст. Пас аз ин боздоштҳо даҳҳо ҳазор нафар аз ҳаводорони ӯ ба кӯчаву хиёбонҳо рехта, хеле аз биноҳо ва дороиҳои мансуб ба артиши ин кишварро мавриди ҳамла қарор дода, мавҷе аз ноамниҳои камсобиқаро дар ин кишвар ба вуҷуд овардаанд.
Ҳукумат барои ором кардани мардум ва ба эътидол овардани авзоъ аз артиш кумак хоста, вале бо ин ҳол мардуми ба хиёбонҳо омада, ба эътирозҳои худ идома доданд, ки дар натиҷа байни онҳо даргириҳо низ сурат гирифтааст. Тибқи оморҳои расмӣ дасти кам то ҳол 10 нафар кушта ва наздик ба 200 каси дигар захмӣ шудааст.
Мақомоти интизомӣ ва артиши Покистон собиқ Нахуствазири ин кишварро ба фасод муттаҳам мекунанд, вале Имрон Хон ҳама ин иттиҳомотро дорои ангезаҳои сиёсӣ дониста онҳоро рад мекунад.
