Кормандони пулис як сокини ноҳияи Файзободро бо гумони расонидани зарари сабук ба саломатӣ боздошт карданд. Зан писари 3-солаашро латукӯб кардааст.
Бино ба иттилои Маркази матбуотии ВКД Тоҷикистон, ин ҳодиса 28-уми июли соли ҷорӣ дар деҳаи Ҷавонони ноҳияи Файзобод рух додааст.
Дар хабар гуфта мешавад, ки як зани 24-солаи маҳаллӣ писари 3-солаи худро латукӯб карда, бо корди хоҷагӣ 2-маротиба ба қафаси сина аз тарафи чап ва оринҷи дасти росташ задааст. Мувофиқи хулосаи экспертизаи суди тиббӣ, кӯдак зарари ҷисмонии сабук ба саломатиаш бардоштааст.
Нисбати гумонбар тибқи моддаҳои 112 (Қасдан расонидани зарари сабук ба саломатӣ) ва 174 (Иҷро накардани ӯҳдадории тарбияи ноболиғ) -и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, тафтишот идома дорад.
