Чаҳор нафар аз сокинони норозии ноҳияи Восеъ, ки барои соҳиб шудани ҳаққи худ сари замине ҷамъ омада буданд, аз ҷониби маъмурони амниятии ноҳияи Восеъ бозпурсӣ шуданд.
Боймурод Раҷабов, сокини ҷамоати ба номи Худоёр Раҷабов, ки дар он ҷамъомади эътирозии мардум ширкат ва суханронӣ карда буд, ба Радиои Озодӣ гуфта, ки рӯзи 15-уми март ӯ ва се нафари дигарро ба идораи амният даъват карданд.
“Дар навор мегуфтам, ки раиси ҷамоат, вакили маҳалла ва ё раиси ноҳия омада, дар сари замин масъаларо ҳал кунанд, то ин ки мо ба кишт шуруъ кунем. Баҳор шуд. Роҳ ба сӯйи Русия бастааст. Дар инҷо моро аз саҳми замин маҳрум кардаанд”, – нақл кард ӯ.
Раҷабов ва ҳамроҳонашро пас аз боспурсӣ раҳо кардаанд, аммо маъмурони амниятӣ аз шарҳи қазия худдорӣ кардаанд. Мақомот танҳо гуфтаанд, ки қазияи онҳо баъди таҷлили ҷашни Наврӯз баррасӣ мешавад.
Ёдовар мешавем, ки чанде пеш шуморе аз сокинони ҷамоати Худоёр Раҷабови ноҳия Восеъ барои гирифта шудани заминҳояшон аз ҷониби Ҷамолиддин Икромов, бародари як мансабдор сари киштзоре ҷамъ омада эътироз карда буданд. Ба иддаои онҳо, порчаҳои замине, ки сокинон солҳо боз дар он кор мекарданд ва зиндагияшон аз ҳисоби деҳқонӣ дар заминҳо пеш мерафт, Икромов заминҳояшонро аз дасташон гирифта ва ба тиҷорати худ илова кардааст ва намегузорад сокинон онҷо кор кунанд.
Аммо то ҳол назари худи Ҷамолиддин Икромов дастрас нест ва маълум нест, ки чӣ мансабе дорад ва бо кадом мансабдор хеши наздик аст.
