Бино ба иттилооти ғайрирасмӣ чархболе, ки субҳи имрӯз мардуми Рӯшонро бомборон кард, сарнагун шудааст. Дар ин бора Андрей Серенко, рӯзноманигорои рус хабар дод.
Серенко дар канали телеграмии худ аз манобеаш оварда, ки мардуми Рӯшон ҳеч навъи силоҳи гармро надоштанд ва намедонанд, ки ин чархбол чи гуна сарнагун шудааст.
Ба қавли шоҳидон чархбол бо мушаке сарнагун гашта, ки аз ҷониби Афғонистон партоб шудааст. Аммо ҷиҳатҳои расмӣ то ҳол ин хабарро тасдиқ ва ё таъйид накардаанд.
Дар ҳамин ҳол Pamir Daily News аз манбаи худ дар маркази ноҳияи Рӯшон иттилоъ дод, ки дар даргириҳои субҳи имрӯз то кунун 11 нафар кушта шудаанд.
“Дар байни кушташудагон низомиён низ ҳастанд. Аксаран бо корд ва ё табар кушта шудаанд”, омадааст дар хабар.
Ба гуфтаи таҳлилгарони мустақил, агар ин сарнагун шудани чархболу ин даргириҳои шадид дуруст бошад, пас ин ҳаводис метавонад дар минтақа ба як задухӯрди бузурги мусаллаҳона табдил ёбад.
Ба Azda.tv то ҳол муаяссар нашудааст, ки хабарро аз манобеъи расмӣ тасдиқ кунад. Дар ҳоли тасдиқи он хабар такмил мешавад.
