Гурӯҳе аз амонатгузорони “Тоҷпронбонк” ба хотири гирифтани амнатҳои гузоштаашон дар назди Бонки миллӣ ва Парлумон ҷамъ омада мегӯянд, ки зиёда аз як моҳ мешавад ба назди раиси Бонки миллӣ мераванд, вале ба назди онҳо ҳозир намешавад.
Як вакили Маҷлиси Намояндагон машварат додааст, ки ба таври хаттӣ муроҷиат кунанд.
Радиои Озодӣ навиштааст, зангҳои пай дар пай ба масъулини Бонки милли дар ин маврид бенатиҷа буд.
Солеҳамоҳ Самадова, раиси Шӯрои амонатдорони “Тоҷпромбонк” ба Радиои Озодӣ гуфтааст, бо гузашти тақрибан чаҳор сол наметавонад беш аз 400 ҳазор сомониашро аз бонк бигирад. Ӯ гуфт, умед доштанд раиси нави Бонки миллӣ ба ҳалли мушкилашон иқдом мекунад, вале акси садое нашуниданд.
Ин ҷабрдида мегӯяд, “Раиси пешини Бонки миллӣ чаҳор сол ваъда дод, ваъдаи хушку холӣ. Панҷ ҳафта аст, ки ба қабули раиси нав меоем, то ба дарди дили мо гӯш бидиҳад. Як бор ба назди мо набаромад. Моро қабул кардан намехоҳад, гӯш кардан намехоҳад…”,
Муштариёни бонк мегӯянд, дар моҳи марти имсол муҳлати бозгардондани амонатҳояшон ба поён мерасад ва кашолкорӣ дар фурӯши амволи бонк онҳоро нигарон кардааст.
Парвина Пирмаҳмадова, муштарии дигари “Тоҷпромбонк”, гуфтааст, ин шабу рӯз бемор аст ва ба 17 ҳазор сомонии бандмондааш дар бонк сахт эҳтиёҷ дорад. “Пуламро намедиҳанд, ки табобат гирам. Ҳамагӣ 400 сомонӣ медиҳанд, ки ин чӣ мешавад? Бо ин хӯрок гирам ё рафта дору харам?”
Чанде пеш Фирӯз Шарипов, масъули тақсими амвол ва дороиҳои “Тоҷпромбонк” гуфта буд, ки беш аз 30 миллион сомонӣ амонати мардум дар бонк мондааст ва бояд баргардонда шавад.
Ин дар ҳолест, ки Додгоҳи ноҳияи Синои шаҳри Душанбе раиси собиқи бонк Ҷамшед Зиёевро ба 8,5 сол зиндон маҳкум кардааст. Муштариён хостори он буданд, ки Зиёев аввал пули онҳоро баргардонад.
Намояндагони бонк ҳамеша иддао мекунанд, ки ба қадри имкон пули муштариёнро медиҳанд, вале амонатгузорони “Тоҷпромбонк” чанде пеш шикоят доштанд, ки ба онҳо дар ивази пул манзил ё амволи дигар пешниҳод мешавад ва нархаш аз қимати бозор чандин баробар гарон асту онро қабул карда наметавонанд.
