Қарор буд имрӯз, 23-юми апрел идомаи музокирот барои поён додани ҷанги Русия ва Украина дар Лондон баргузор шавад, аммо он ба таъхир гузошта шуд.
Гуфта мешавад, имрӯз дар Лондон намояндагони сатҳи олӣ, вазирони корҳои хориҷии Украина, Бритониё, ИМА, Фаронса ва Олмон ҷамъ омада буданд. Ин вохӯрӣ бояд идомаи музокирот пас аз нишасти Париж ва муҳокимаи тарҳи пешниҳодкардаи ИМА барои поён додани ҷанг миёни Русия ва Украина мешуд. Аммо ногаҳон нишасти ҷонибҳо ба таъхир гузошта шуд.
Ба иттилои расонаҳои амрикоӣ ва бритониёӣ, сабаби қатъи идомаи музокирот ва ё таъхири он фош шудани тарҳи пинҳонии ИМА ба унвони “сулҳ”, ки аз ҷониби The Wall Street Journal, Axios ва The Telegraph нашр шуд, мебошад.
ИМА дар ин тарҳи худ чунин пешниҳод кардааст:
- Ба таври расмӣ Қрим қаламрави Русия эътироф шавад;
- Ҳолати кунунии хатти ҷанг ба таври ғайрирасмӣ (де-факто) нигоҳ дошта шавад, яъне ба таври ғайрирасмӣ қисмҳои ишғолнамудаи Донбасс, Херсон ва Запорожье аз ҷониби Русия эътироф шавад;
- Украина узви НАТО нашавад, вале имкони узвият дар Иттиҳоди Аврупоро дошта бошад;
- Русия аз ду минтақаи хурд дар Херсон ақибнишинӣ кунад;
- Нерӯгоҳи ҳастаии Запороже зери назорати ИМА гузарад;
- ИМА таҳримҳоро бардошт ва равобити иқтисодӣ бо Русияро аз сар гирад;
- Ба Украина кафолати амниятӣ дода шавад, вале на аз ҷониби ИМА, балки аз сӯи кишварҳои аврупоӣ;
- Як қисмати вилояти Харков баргардонида шавад;
- Озодии ҳаракат дар рӯди Днепр;
- Кумак ва ҷуброн барои бозсозии Украина.
Вобаста ба ин тарҳ раисҷумҳури Украина Владимир Зеленский вокуниш нишон дода, гуфтааст, ки Украина ҳеҷ гоҳ Қримро, ки аз ҷониби Русия ишғол шудааст, эътироф намекунад ва ин мавзуъ мухолифи Сарқонуни кишвараш аст. Украина хостори сулҳи одилона ва қатъи бечунучарои оташбас аст.
Дар ҳамин ҳол, мақомоти Украина бо шубҳа ба ин тарҳ менигаранд. Иттиҳоди Аврупо низ мухолифи бардоштани таҳримҳо аз Русия пеш аз расидан ба мувофиқа аст.
Пас аз вокуниши Украина ба ин тарҳ мулоқоти сатҳи вазирони корҳои хориҷӣ дар Лондон лағв шуд, аммо гуфта мешавад, музокирот дар сатҳи поёнтар, байни ҳайатҳо ва намояндагони баландпояи панҷ кишвар дар шакли пӯшида идома хоҳад ёфт.
Тавре расонаҳои бритониёӣ хабар медиҳанд, бо вуҷуди лағви мулоқот ҳоло ҳайати Украина бо иштироки роҳбари Дастгоҳи президенти Украина Андрей Ермак, вазири дифоъ Рустем Умеров ва муовини Вазорати корҳои хориҷӣ Андрей Сибига дар Лондон ҳузур доранд.
Ермак изҳор дошт, ки Украина бо вуҷуди ҳама монеаҳо дар роҳи расидан ба сулҳ истодагарӣ мекунад ва дар Лондон кӯшиш хоҳад кард, ки дар масъалаи оташбас ва оғози раванди музокироти сулҳ бо тамоми ҷонибҳо ба мувофиқа расад.
