Кормандони Кумитаи ҳолатҳои фавқулоддаи Тоҷикистон дар шаҳри Панҷакенти вилояти Суғд ҷасади духтраи 16-соларо, ки рӯзи 9-уми август нопадид шуда буд, аз соҳили дарёи Зарафшон пайдо карданд.
Дар ин бора 11-уми августи соли ҷорӣ дафтари матбуоти Кумитаи ҳолатҳои фавқулодда ва мудофиаи граждании Ҳукумати Ҷумҳурии Тоҷикистон хабар дод.
Гуфта мешавад, духтари 16-сола сокини деҳаи Хӯҷапанҷи ҷамоати деҳоти Амондараи шаҳри Панҷекат буд ва рӯзи 9-уми августи соли равон “баъди як муноқишаи оилавӣ” аз хона берун шуда, дигар барнагаштаст. Баъд аз корҳои ҷустуҷӯӣ ҷасади ин духтар имрӯз, 11-уми август аз соҳили дарёи Зарафшон пайдо шуд.
Ба маълумоти манбаъ, ҷасади ин ноболиғ аз соҳили дарёи Зарафшон, дар ҳудуди деҳаи Озодагони ҷамоати деҳоти Хурмӣ пайдо ва ба кормандони мақомоти ҳифзи ҳуқуқ супурда шуд.
Дар робита ба ин ҳодиса КҲФ аз сокинони кишвар ва волидон хостааст, ки бо фарзандони худ бо муҳаббати падариву модарӣ ва ҳисси дилсӯзӣ ба ояндаи онҳо муносибат кунанд. Ва талош кунанд муноқишаҳои оилавиро бо хушӣ анҷом диҳанд.
Аммо Кумитаи ҳолатҳои фавқулодда дақиқ нагуфтааст, ки байни ин ноболиғи 16-сола ва хонаводааш чӣ муноқишае сар зада ва айнан чӣ чиз боис шуда, ки духтари ноболиғ худро ба дарё афканад. Ҳатто ҷузъиёти он то ҳол рӯшан нест, ки ин ҳодиса худкушӣ будаааст ва ё не.
