Додгоҳи Олтой як шаҳрванди 22-солаи Тоҷикистонро бо иттиҳоми ҳамдастӣ бо созмони террористии “Давлати Исломӣ” гунаҳкор дониста, ӯро ба 12 соли зиндон маҳкум кард. Дар ин бора хабаргузории ТАСС аз Хадамоти матбуоти минтақавии ФСБ рӯзи панҷшанбе хабар дод.
Додгоҳи Олтой далелҳои ҷамъоваришуда нисбати шаҳрванди Ҷумҳурии Тоҷикистон Иброҳимҷонов Илҳомхуҷа соли таваллудаш 1998-ро “далелҳои кофӣ” ҳисобида нисбаташ бо иттиҳоми “Омодагӣ барои иштирок ва фаъолият кардан дар созмонҳое, ки мутобиқи қонунгузории Федератсияи Русия террористӣ эътироф шудаанд”, парванда боз кард. Дар хабар омада, ки нисбати Иброҳимҷонов бо 4 моддаи Кодекси ҷиноятии Федератсияи Русия айб эълон шудааст.
Тибқи иттилои айбдоркунандаи давлатии Прокуратураи Олтой Вера Кондаурова, “ин шаҳрванди Тоҷикистон барои маҷмӯи ҷиноятҳои содиршуда ба муддати 12 сол аз озодӣ маҳрум карда шуд – се соли аввал бо адои ҷазо дар маҳбаси инфиродии сахттар ва боқимондаи мӯҳлатро дар зиндони низомаш сахт сипврӣ мекунад.
Гуфта мешавад, ин шаҳрванди Тоҷикистон, ки дар қаламрави Олтой бо патент кору зиндагӣ мекардааст, бо як аъзои фаъоли ин созмони террористӣ тариқи интернет робита барқарор карда, барои шомил шудан бо онҳо ва рафтан ба минтақаи низоъ розӣ шудааст.
Ба иттилои манбаъ, айбдоршаванда бар ивази маблағ аз ҷойҳои серодам ва иншооти ҷамъиятӣ дар Барнаул маълумот ҷамъ меовардааст. Дар ҷараёни тафтишот Иброҳимҷонов иқрор карда, ки ин корро дидаву дониста кардааст.
Ёдовар мешавем, ки Иброҳимҷонов аз ҷониби кормандони ФСБ-и Русия дар фурудгоҳи Барнаули қаламрави Олтой моҳи июни соли 2020 ҳангоми парвоз ба Маскав боздошт шуд.
Баъзе коршиносони тоҷик бар ин назаранд, ин раванде, ки мақомоти Русия чандест пеш гирифтаанд, яъне муҳоҷирони давлатҳои Осиёи Марказӣ, хусусан шаҳрвандони Тоҷикистонро бо иттиҳоми терроризм ва ҳамдастӣ бо созмони мамнуи “Давлати Исломӣ” айбдор мекунанд, як ҳолати тарс додани ҷавонон ва пешгирӣ аз амалиёти террористии эҳтимолӣ буда метавонад.
Ба назари онҳо ин боздоштҳо бештар сиёҳ кардани чеҳраи муҳоҷирони давлатҳои Осиёи Марказиро дар худ дорад. Чун на ҳамаи дастгиршудаҳо ба ин иттиҳом сад дарсад айбдоранд. Шояд баъзе аз онҳо чунин бошанд, вале дар як моҳ чанд нафарро бо ин иттиҳом дастгир кардан шубҳаҳоро атрофи ин амалиёт бештар кардааст.
