Сарояндаи мардумии Тоҷикистон, ки дар бистари беморист мегӯяд, 30 суруди нонавишта дорам” ва гар Худо шифояшро арзонӣ фармояд, онҳоро сабт мекунам.
Имрӯз, 16-уми ноябри соли 2022 Чилахон Холов, сарояндаи халқии Тоҷикистон дар суҳбат бо муовини Вазорати фарҳанг ва ҳамроҳонаш гуфтааст, ки “ҳанӯз 30 суруди тозаи НОНАВИШТА дар кулбори эҷодияш дорад.”
Раҳмоналӣ Мирализода, ки дар ин ҳайат ба аёдати ҳунарманди мардумии Тоҷикистон рафта буд, мегӯяд, “ин шабу рӯзҳо овозхони маънисарои мо аз беморӣ каме ранҷ мебаранд. Аммо аз дидор ва суҳбати эшон мо бо хотири осуда баргаштем. Зеро Чилахон Холов дар ҳар ҳол рӯҳияи қавӣ дорад.”
Гуфта мешавад, Чилахон Холов, дорандаи унвони Ҳунарманди шоисатаи Тоҷикистон аст. Ӯ зодаи Кангурти минтақаи Кӯлоб аст, ки худро яке аз пайравони Карими Шиш медонад. Чилахон Холов, яке аз сермаҳсултарин ҳунармандони Тоҷикистон аст, ки бисёратар таронаҳои халқӣ месарояд ва бо ҳамин сурудаҳояш зиёдтар дар байни мардум мухлис пайдо кардааст.
