Як марди 31-солаи сокини ҷамоати шаҳраки Ховалинги ноҳияи Ховалинг бо гумони одамкушӣ аз ҷониби кормандони милиса дастгир карда шудааст.
Тибқи иттиллои дафтари матбуоти ВКД ин шахс 15-уми июли соли ҷорӣ тахминан соати 16:23-дақиқа бо бародари ҳамсараш, марди 35-солаи сокини ҷамоати деҳоти Ҷомбахти ноҳияи мазкур дар роҳи автомобилгарди «Восеъ-Ховалинг», дар кӯчаи 8-март вохӯрда, дар дохили автомашинаи тамғаи “Опел-Астра”, ки ба марҳум марди 35-сола тааллуқ дорад, баҳсу муноқиша намудаанд.
Сипас, бо мақсади аз ҳаёт маҳрум сохтани марҳум аз ҷайби шими дар танаш буда, 1-адад корди ошхонагии бо худ доштаашро гирифта, 6-маротиба дар аъзои бадани марҳум задааст.
Дар натиҷа марҳум ҷароҳати вазнини ҷисмонӣ бардошта, дар беморхонаи марказии ноҳия ба ҳалокат расидааст.
Инчунин ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия ҷавони 24-солаи сокини пойтахт бо гумони одамкушӣ дастгир карда шуд.
Номбурда, шаби 15-уми июли соли 2020, тахминан соати 20:00 дар хонаи истиқоматиашон бо бародараш ҷавони 18-солаи сокини ҳамон ҷо ҷангу ҷанҷол карда, бо корди дар дасташ буда 1-маротиба дар қафаси синааш задааст.
Дар натиҷа ҷабрдида ҷароҳати вазнини ҷисонӣ бардошта, дар ҷойи ҳодиса ба ҳалокат расидааст.
Тафтишот алайҳи ин ду нафар оғоз шудааст.
