Субҳи рӯзи душанбе, 3-юми июл нерӯҳои исроилӣ чанд мавзеъеро дар урдугоҳи Ҷанин дар Каронаи Бохтарӣ мавриди ҳадаф қарор доданд.
Вазорати тандурустии Фаластин аз кушта шудани 8 фаластинӣ ва 27 захмӣ хабар дод, ки вазъи саломатии дасти кам 8 нафари захмиён вазнин арзёбӣ мешавад.
Ба гузориши “Ал-Ҷазира”, шурӯъ аз бомдоди имрӯз байни нерӯҳои исроилӣ ва муқовимати фаластинӣ даргириҳо оғоз шуда буд ва ҳоло ин задухӯрд то миёни шаҳри Ҷанин расидааст.
Артиши Исроил субҳи имрӯз сабаби ин ҳамлаашро “Иқдоми густарда алайҳи терроризм дар Каронаи Бохтарӣ” унвон кард. Аммо нерӯҳои муқовимати ҷиҳодии фаластинӣ ин иқдоми Исроилро ҳамла барои ишғоли заминҳои Фаластин арзёбӣ карда, мегӯянд, “то охирин нафас ва гулула меҷангем” ва аз ҳама шохаҳои гурӯҳҳои ҷиҳодии Фаластин даъват карда, ки дар муқобили ишғоли Исроил муттаҳид бошанд.
Дар пайи ин ҳодиса субҳи имрӯз Вазорати корҳои хориҷаи Қатар бо нашри изҳороте навишт, ки кишвараш ҳамлаи Исроил бар шаҳраки Ҷанинро, ки боиси кушта шудани чанд нафари бегуноҳ гардида, “бо шадидтарин алфоз маҳкум мекунад.”
Вазорати хориҷаи Қатар ҳамчунин ин ҳамлаи Исроилро тавтиаи нави ин кишвар дониста, аз мақомоти Исроил таваққуфи фаврии ин ҳамларо талаб кардааст.
Ҳамзамон кишвари Имороти Муттаҳидаи Араб низ бо нашри изҳороте ҳамлаи нерӯҳои исроилиро маҳкум карда, таваққуфи фаврии онро аз мақомоти Исроил хостааст.
