Тоҷикистон давоми моҳи январи соли ҷорӣ ба хориҷ аз кишвар ба ҳаҷми 4.3 миллион доллари амрикоӣ барқ фурӯхтааст, ки ин нишондод нисбат ба ҳамин давраи соли 2022 50 дарсад бештар аст.
Бино ба иттилои “Avesta”, ягона ширкати барқрасони Тоҷикистон “Барқи тоҷик” дар бораи миқдори воқеӣ аз нигоҳи кВт/соат маълумоте ироа накадааст. Гуфта мешавад, ин ширкати барқрасон тасмим гирифта, ки содироти барқро ба хориҷи кишвар афзоиш диҳад.
Бо вуҷуди афзоиши содироти нерӯи барқ ба кишварҳои ҳамсоя, “Барқи тоҷик” мегӯяд, дар фасли зимистон ба ҳаҷми камтар барқ мефурӯшад. Дар ҳоле ки ин ширкат аз ҳаҷми содироти ба кишварҳои ҳамсоя, аз ҷумла Афғонистон ва Узбекистон маълумоте ироа намекунад.
Масъулони “Барқи тоҷик” дар рӯзи 14-уми феврал дар нишасти хабарӣ гуфта буданд, ки соли 2022 Тоҷикистон дар маҷмуъ 21,5 миллиард кВт/соат нерӯи барқ истеҳсол карда, аз ин миқдор ба Афғонистон 1,7 миллиард кВт/соат ва ба Узбакистон 1,6 миллиард кВт/соат нерӯи барқро ба ҳаҷми 1,6 миллион доллар фурӯхтааст.
Ин дар ҳолест, ки дар дохили кишвар сокинон аз сармо ранҷ мебаранд, вале барқ аз соатҳои муқарраршуда камтар дода мешавад. Дар навоҳии дурдасти кишвар аҳолӣ мегӯянд, ба онҳо дар як шабонарӯз танҳо 5 соат – 2 соат субҳ ва 3 соат бегоҳ барқ дода мешавад.
