Кормандони Хадамоти гумруки Тоҷикистон дар талоши қочоқи 90 кило тилло ва садҳо ҳазор пул даст доштаанд. Дар ин бора намояндаи Хадамоти гумрук имрӯз 18-уми феврал зимни нишасти матботӣ хабар дод.
Раҳмоналӣ Раҳимзода, сардори Раёсати ташкилоти мубориза бо ҳуқуқвайронкунии гумрукӣ дар ин нишаст гуфт, дар доираи парвандаи талоши қочоқи тилло ва пул ба хориҷа се кормандашон боздошт шудааст.
Ба иттилои хабарҳо кормандони ин ниҳод боз чор шаҳрванди дигар аз сӯи Прокуратураи генералии Тоҷикистон рӯзи 15 ноябри соли 2020 дар Фурудгоҳи байналмилалии Душанбе боздошт шуда, алайҳашон тафтишот идома дорад.
Қаблан Юсуф Раҳмон, додситони кулли Тоҷикистон, зимни ҳисоботи ахираш ба Маҷлиси миллӣ, ки раҳбарияшро Рустами Эмомалӣ писари раисҷумҳури кишвар ба уҳда дорад, боздошти гурӯҳи қочоқбар бо наздики 90 кило тиллою садҳо ҳазор фунт стерлингро тасдиқ кард.
“Аз онҳо 89 килою 350 гр тилло, 489 638 риёл ва 200 000 фунт стерлинг, ки бо роҳи қочоқ ба шаҳри Дубайи Аморати Муттаҳидаи Араб интиқол дода мешуд, ёфта, мусодира гардид”.
Ҳамчунин Юсуф Раҳмон гуфта буд, ки маблағи умумӣ зиёда аз 10 миллион долларро ташкил медиҳад.
Бино ба иттилои манобеи Sputnik Тоҷикистон ин тиллову пулҳо аз Афғонистон ба Душанбе қочоқ шуда буданд ва бояд ба Дубай бурда мешуданд.
