Дар ноҳияи Панҷи вилояти Хатлон як марди 37-сола дар ҳолати мастӣ падарашро бо болға зада куштааст. Дар ин бора Додситони кулли кишвар хабар дод.
Ба иттилои Додситони кулли Тоҷикистон, Исанқулов Муҳаммадҷон Авазович соли таваллудаш 1985, сокини ноҳияи Панҷи вилояти Хатлон дар торихи 07 июни соли 2022 ҳамроҳи падараш Бӯстонов Аваз дар хонаашон шароби “Тоҷикистон-Гость”-ро менӯшанд. Пас аз нӯшидани шароб ҳарду сархӯш мешаванд ва байни падару писар муноқиша барпо мешавад, дар натиҷа писар падарашро бо болға дар сару рӯяш зада мекушад.
Додситони ноҳияи Панҷ, нисбати Исанқулов Муҳаммадҷон бо моддаи 104 қисми 2 банди “е”-и КҶ Ҷумҳурии Тоҷикистон парвандаи ҷиноятӣ боз мекунад.
Ба иттилои манбаъ, дар торихи 16-уми сентябри соли ҷорӣ Додгоҳи вилояти Хатлон Исанқуловро бо моддае, ки додситонӣ парвандаро ба анҷом ранода буд, (моддаи 104 қисми 2 банди “е” КҶ Ҷумҳурии Тоҷикистон) гунаҳгор дониста, ӯро ба мӯҳлати 20 сол бо адо намудани ҷазо дар колонияи ислоҳии дорои низомаш сахт аз озодӣ маҳрум кард.
