Ба иттилои Вазорати корҳои хориҷии Тоҷикистон, рӯзи 2-юми октябри соли ҷорӣ дар шаҳри Бодканди Қирғизистон ҷаласаи навбатии Комиссияи байниҳукуматии Тоҷикистону Қирғизистон дар бораи таъйин ва аломатгузории марзи давлатии ду кишвар баргузор шуд.
Дар ин нишаст ҳайати Тоҷикистонро раиси Кумитаи давлатии амнияти миллӣ Саймумин Ятимов ва ҳайати Қирғизистонро раиси Кумитаи давлатии амнияти миллӣ Қамчибек Ташиев раҳбарӣ кардаанд.
“Роҳбари ҳайати Ҷумҳурии Тоҷикистон Ятимов С. ва Роҳбари ҳайати Ҷумҳурии Қирғизистон Ташиев Қ. бо ҳусни тафоҳуми комил оид ба зарурати фаъол намудани тасвири гузариши хатти лоиҳавии сарҳади давлатии Қирғизистону Тоҷикистон дар қитъаҳои боқимонда изҳор намуда, ба гурӯҳҳои корӣ дастурҳои дахлдор додаанд.“, омадааст дар хабар.
Гуфта мешавад, гурӯҳҳои кории топографӣ ва ҳуқуқии ҳайатҳои ҳукуматии Тоҷикистону Қирғизистон дар бораи таъйин ва аломатгузории марзи давлатӣ барои “тасвири хатти лоиҳавӣ дар минтақаҳои боқимондаи сарҳади давлатии Тоҷикистону Қирғизистон корро идома медиҳанд.”
Ба иттилои манбаъ, дар ниҳояти мулоқоту гуфтугӯҳо Протокол ба имзо расид.
Аммо Вазорати корҳои хориҷии Тоҷикистон дар бораи ҷузъиёти ин музокирот чизе нагуфтааст. Ва маълум нест дақиқан ҷонибҳо ба чӣ тавофуқоте даст ёфтанд.
Раисони КДАМ-и Тоҷикистону Қирғизистон дар изҳороти худ аз имзо шудани протокол изҳори хушнудӣ карда, таъкид намудаанд, ки ин протокол ҳамагуна мушкилоту низоъҳои байни якдигарро бартараф мекунад. Ва Қамчибек Тошиев афзуда, ки дар рӯзҳои наздик таъйин ва аломатгузории тамоми нуқтаҳои баҳсии марз ба поён мерасад ва қарори ниҳоиро дар ин бора ҷонибҳо ба имзо хоҳанд расонд.
Ба иттилои Радиои Озодӣ, Нурғозӣ Анорқулов, рӯзноманигори наздик ба ҳукумати Қирғизистон, рӯзи 2-уми октябр дар саҳифаи фейсбукияш навишта, ки “Тоҷикистон аз даъвоҳои ҳудудии худ даст кашид”. Аммо Тоҷикистон то ҳол ба ин иддао вокуниш накардааст.
Ин дар ҳолест, ки 15-уми сентябри соли ҷорӣ, замоне ки президентҳои кишварҳои Осиёи Марказӣ, аз ҷумла президенти Қирғизистон Содир Ҷабборов дар Душанбе бо Раҳмон мулоқот дошт, Тошиев дар изҳороте гуфт, ки агар Тоҷикистон аз даъвоҳои худ дар бораи марз даст накашад, мо ҳам санадҳоеро аз бойгонӣ пайдо кардаем, ки онро пешниҳод хоҳем кард ва агар лозим шавад барои ин кор нерӯ ҳам дорем.
