Суди ноҳияи Калинини Уфа, шаҳрванди 35-солаи Ҷумҳурии Тоҷикистон Рустам Замоновро барои вайрон кардани режими будубош дар Русия 2 ҳазор рубл ҷарима кард. Дар ин бора “Коммерсант” хабар медиҳад.
Бино бар иттилои Идораи ФСБ дар Бошқирдистон, ӯ ба аъзои “Ҳизби наҳзати исломии Тоҷикистон” кумак мерасонидааст.
Тибқи иттилои хадамоти матбуоти муштараки додгоҳҳои Бошқирдистон, додгоҳ ӯро дар қонуншикании маъмурӣ гунаҳгор дониста, амр додааст, ки бо роҳи иҷборӣ аз марзи давлатӣ берун карда шавад.
Дар ҳоли ҳозир дар куҷо ва дар кадом ҳолат қарор доштани ин шаҳрванди Тоҷикистон маълум нест.
То ҳол назари Замонов ва наздиконаш низ дар ин бора дастраси расонаҳо нашудааст.
Бо пайдо шудани маълумоти нав дар ин бора, мо онро нашр хоҳем кард.
