Ба иттилои Раёсати зиндонҳои вилояти Тамбови Русия аз як зодаи Тоҷикистон, ки мехостааст, ба зиндони №1 ашёи мамнӯаро ба ин зиндон ворид кунад, пешгирӣ карда шудааст.
Ба навиштаи сомонаи Раёсати зиндонҳои Тамбов, зиндонбонҳо аз бадани шаҳрванди Тоҷикистон 13 бастаи бо скотч печондашударо пайдо кардаанд, ки дар дохили он бастаҳо 4 телефони мобилӣ, 29 “зарядка”, 27 ноқили USB ва 200 SIM-кортро ҷойгир карда будааст, ҳамаашро мусодира кардаанд.
Барои зиндониён истифодаи телфонҳои мобилӣ дар зиндон манъ буда, вале дида мешавад, ки бархе аз зиндониён дар дохили зиндон, пинҳонӣ аз маъмурияти зиндон телeфони мобилӣ истифода мекунанд.
Ҳамчунин гуфта мешавад, як ҳафта қабл дар ҳамин маҳбас як шаҳрванди Узбекистонро ҳангоми кӯшиши даровардани 302 сим-корт, 38 гӯшӣ (наушник), 6 ноқили USB ва як “зарядка” боздошт карда будаанд.
Тибқи оморҳои расмии мақомоти Русия, зиёда аз 7 ҳазор шаҳрванди Тоҷикистон дар зиндонҳои он кишвар адои ҳукм мекунанд ва беш аз 1200 зодаи дигари Тоҷикистон дар боздоштгоҳҳои муваққатӣ қарор доранд. Гуфта мешавад, сеяки онҳо бо ҷиноятҳои марбут ба қочоқи маводи мухаддир ба зиндон андохта шудаанд.
