Бо ин гуна дархост Вакили маҷлиси қонунгузории Санкт-Петербург Андрей Анохин ба Вазорати меҳнат ва ҳифзи иҷтимоии аҳолии Русия муроҷиатнома фиристода, дархост намудааст, ки ба кори муҳоҷирон дар таксиҳо маҳдудият ҷорӣ шавад.
Дар ин бора шабакаи “Царград” бо истинод ба нусхаи номаи расмии Анохин, ки дар ихтиёри ин шабака аст, хабар медиҳад.
Дар дархости худ, Анохин ба афзоиши назарраси садамаҳои нақлиётӣ бо таксиҳо таваҷҷӯҳ зоҳир намуда, гуфтааст, ки дар соли 2019 шумораи садамаҳо 60% афзуда, сатҳи фавт ба 41% расида буд.
Дар идома вакили маҷлис иброз доштааст, ки дар соли 2020 болоравии ҳодисаҳои садама нисбат ба соли гузашта боз 25% ба қайд гирифта шуд. Ба гуфтаи ӯ муҳоҷироне, ки ба ҳайси ронанда кор мекунанд, аксар вақт меъёрҳоро вайрон мекунанд, бе хобу истироҳат таксиронӣ мекунанд, аксар вақт рост дар паси чамбараки мошин хоб мераванд ва ҳолати садамавиро ба вуҷуд меоранд.
Ғайр аз он, Анохин ҳолатҳои таҷовузи мусофирон аз ҷониби ронандагони таксиҳои муҳоҷирро зикр намудааст. Чунин ҳодисаҳои пурсарусадо дар Санкт-Петербург, Маскав ва дигар шаҳрҳо ҷой доштанд.
Дар ин робита, депутат аз Котяков хоҳиш намудааст, ки ба кори муҳоҷирон дар таксиҳо маҳдудият ҷорӣ шавад.
Ин барои бо кор таъмин кардани шаҳрвандони Федератсияи Русия, ки дар пандемияи ҷаҳонӣ ниҳоят муҳим аст, кӯмак мекунад, қайд кардааст Вакили маҷлиси қонунгузории Санкт-Петербург Андрей Анохин.
