Думаи давлатии Русия аз лоиҳаи қонуне пуштибонӣ кард, ки тибқи он фарзандони муҳоҷирон барои қабул шудан дар мактабҳои ин кишвар бояд аз забони русӣ имтиҳон супоранд.
Аммо коршиносони соҳаи таълим ва таҳлилгарон аз ин иқдоми кишвари Русия интиқод намуда, ба мақомот ҳушдор медиҳанд, ки бо қабули ин қонун хатарҳои дур мондани наврасон аз таълиму тарбия вуҷуд дорад.
Вакилони Думаи давлатии Русия дар хониши якуми ин лоиҳаи қонун ҳама бо як овоз онро қабул карданд. Ин қонун барои шомил намудани кӯдакони муҳоҷир дар мактабҳои ин кишвар донистани забони русиро барои онҳо ҳатмӣ мекунад. Дар сурати тасдиқи пурраи ин қонун аз ҷониби Дума дар модаи 78-и Қонуни ин кишвар тағйиротҳо дохил карда мешавад. Пас аз он кӯдаконе, ки наметавонанд имтиҳони донитснаи забони русиро бо мувафақият бисупоранд, аз идомаи таҳсил маҳрум хоҳанд шуд.
Ин лоиҳа дар бораи чӣ гуна будани имтиҳон чизеро мушаххас намекунад, ба ҳамин хотир ин амр бар уҳдаи Вазорати маорифи ин кишвар гузошта хоҳад шуд.
Ҳамчунин нафаронеро, ки ғайриқонунӣ дар ин кишвар ба сар мебаранд, дар мактабҳо пазируфта намешаванд ва мактабҳо ҳақ пайдо мекунанд ҳагоми қабул ҳуҷҷатҳое, ки қонунӣ будани будубоши довталабро дар ин кишвар асоснок мекунад, бисанҷанд.
Ярослав Нилов, вакили Дума ва яке аз муаллифони лоиҳаи қонун бар ин назар аст, ки надонистани забони русӣ аз сӯи фарзандони муҳоҷирон ба рафъи таълими фарзандони русҳо халал мерасонад ва имкон намедиҳад, ки барномаи таълимиро ба таври дуруст аз худ кунанд.
“Мо бояд дар барои фарзандони руси худамон фикр кунем. Таълим гирифтан мехоҳед? Марҳамат, имтиҳонро бисупоред, таълим бигиред.”, – мегӯяд Ярослав Нилов, раиси Кумитаи сиёсати иҷтимоӣ ва собиқадорони Думаи давлатии Русия.
Ин вакил ҳамазаон қайд мекунад, ки масъулияти тайёрии бачаҳо ба таҳсил ба забони русӣ ба дӯши падару модарони онҳо мебошад. Ба назари ӯ, агар кӯдакон аз имтиҳони забон нагузаранд, таҳсили минбаъдаи русӣ набояд ройгон, балки аз ҳисоби муҳоҷирон пардохт шавад.
Нилов ҳамазаон ба расонаи русии РБК гуфта, ки вакилони фраксияи ЛДПР аллакай лоиҳаи қонунеро ба Думаи давлатӣ пешниҳод кардаанд, талаб мекунад то тамоми таҳсилоти мактабӣ ва касбӣ дар Русия барои муҳоҷирон пулакӣ шавад.
Дар ҳамин ҳол Анна Орлова, раҳбари лоиҳаи “кӯдакони муҳоҷират” бар ин назар аст, ки дар сруати дур мондани наврасон аз муассисаҳои таълимӣ хатари наздик шудани онҳо ба гурӯҳҳои ҷиноятӣ бештар мешавад.
“Ин як қоидаи умумӣ аст. Кӯдак хурдтар бошад, ҳамон қадар забонро тезтар аз худ мекунад. Ва чи қадаре бузургтар шавад, ҳамон қадар мутобиқ шуданаш мушкилтар мешавад.”, – мегӯяд хонум Орлова.
