Рӯзи 12-уми октябр Вазорати тандурустии Тоҷикистон шумораи гирифторони бемории каронавирусро 38 нафар эълон кард.
Бино ба маълумоти расмӣ, аз 30-юми апрели соли равон (замони эътирофи мавҷудияти вируси COVID-19 дар кишвар) то ба имрӯз дар Тоҷикистон 10 ҳазору 260 нафар ба каронавирус гирифтор шудаанд, ки бештар аз 9100 нафари онҳо шифо ёфта, 79 кас ҷон бохтаанд.
Вале ин омори аз ҷониби Вазорати тандурустӣ пешниҳод гардидаро ҷомеаи шаҳрвандии Тоҷикистон чандон қабул надорад ва мегӯянд, воқеият чанд баробар бештар аз омори расмист.
Коршиносони соҳа бар ин назранд, ки ин омори ироа гардида ба ҳеҷ ваҷҳ баёнгари вазъи кунунии Тоҷикистон нест, зеро ба гуфтаи онҳо ҳамарӯза дар шабкаҳои интернетӣ аз вазъи гирифтор гардидан ва ҷон додани сокинон аз каронавирус ё илтиҳоби шуш хабарҳо интишор мегардад, ки ин воқеиятҳо омори расмии мақомотро зери шубҳа қарор медиҳад.
Дар аввали шуюи вируси дар Тоҷикистон аз ҷониби фаъолони ҷомеаи шаҳрвандӣ вебсайте барои сабти омори дақиқи гирифторон ва фавтидагон аз ин беморӣ дар Тоҷикистон роҳандозӣ шуда буд.
Ин вебгоҳ бештар аз 400 нафарро дар рӯйхати фавтидагон шомил карда буд, аммо баъд аз қабул гардидани қонун дар бораи ахбори нодуруст дар мавриди каронавирус дар кишвар он вебгоҳ фаъолиятшро қатъ кард ва ҳоло дигар ҳама ба омори расмии Вазорати тандурстӣ иктифо мекунанд.
