Дар Душанбе бензин гарон ва камчин шудааст. Дар ин бора Радиои Озодӣ хабар дод. Бино ба иттилои ин сомона якбора камчин ва гарон шудани нархи бензин ронандагонро нигарон кардааст.
Гуфта мешавад, ки дар аввали моҳи март нархи як литр бензин 7 сомониву 20 дирам буд, баъд аз гузашти 15 рӯз нархи он ба 8,80 сомонӣ ва ҳатто дар баъзе ҷойҳо ба 9 сомонӣ расидааст.
Ба назари мардум гаронии нархи сӯзишворӣ кори дасти монополистони соҳа мебошад. Хадамоти зиддиинҳисории Тоҷикистон мегӯяд, “болоравии нарх бесабаб нест” ва онро ба як тасмими Қазоқистон рабт медиҳанд.
Ёдовар мешавем, ки айни замон дар Қазоқистон масъалаи манъ шудани интиқоли маҳсулоти нафтӣ ба хориҷи кишвар тариқи нақлиёти автомобилӣ мавриди баррасӣ қарор дорад.
Ронандагон дар Душанбе дар суҳбат бо хабарнигорон гуфтанд, ки бо вуҷуд гарон шудани нарх, ёфтани бензин на дар ҳама нуқтаҳои фурӯши сӯзишворӣ имконпазир ҳаст. Як ронандаи мошини боркаш Неъматулло Ҳикматуллоев, аз он шикоят кард, ки дар Тоҷикистон қимати сӯзишворӣ зуд боло меравад, аммо ҳамагӣ 10 ё 20 дирам арзон мешаваду бас.
Ҳамчунин хабарнигорони Радиои Озодӣ рӯзи 12-уми март дар чанд нуқтаи фурӯши сӯзишворӣ мушоҳида намудаанд, ки бензини навъи 92, ки дар Тоҷикистон серистифода аст, камчин шудааст. Дар баъзе нуқтаҳои фурӯши сӯзишворӣ навиштаи “Бензин нест” часпонида шудааст.
Ба иттилои ронандаҳо дар бархе аз нуқтаҳои дигар, фурӯши бензин маҳдуд шуда, ба як ронанда аз 20 литр зиёд намедиҳанд. Масъулони нуқтаҳои фурӯши сӯзишворӣ мегӯянд, ки “Дар корхонаҳои истеҳсоли нафт дар Қазоқистон, ки сӯзишворӣ аз ҳамон кишвар ба Тоҷикистон меояд, таъмир ҷараён дорад. Бино бар ин, чунин вазъият пеш омадааст.”
Ёдовар мешавем, ки чанд рӯз пеш бар асоси хабари “Казинформ” яке аз се корхонаи бузурги коркарди нафти Қазоқистон бо сабаби мушкилиҳои техникӣ истеҳсоли гази моеъи худро қатъ намуд.
Тоҷикистон ба далели надоштани имконоти кофии коркарди нафт то ба ҳол маҳсулоти нафтиро аз хориҷ ва асосан аз Русияву Қазоқистон дар шакли маҳсулоти тайёр, яъне бензину солярка, мегирад. Ба иттилои расмӣ, соли 2020 ба кишвар 234 ҳазор тонна бензин ва 298 ҳазор тонна сӯзишвории дизелӣ ворид шудааст.
Тибқи омори расмӣ, тақрибан 90 дарсади сӯзишвории мавриди ниёзи Тоҷикистонро аз Қазоқистон меоранд.
Бино ба иттилои дарёфтӣ, дар Тоҷикистон яке аз воридкунандагони асосии маводи сӯхт ширкати “Фароз”-и Шамсулло Соҳибов аст, ки бозор сӯзишвориро пурра зери назорат дорад. Ҳар ширкати дигаре, ки мехоҳад ба кишвар маводи сӯхт ворид кунад, бояд аз “Фароз” иҷозатнома гирад ва сари ҳар тоннаи ворид кардааш маблағ супорад.
Ба назари огаҳони умур, инҳисори бозори маводи сӯхт аз ҷониби ширкати “Фароз” сабаби боло рафтани нархи сузишворӣ дар кишвар гардидааст.
