Мухолифони мусаллаҳи Башшор Асад шоми рӯзи 5-уми декабр эълон карданд, ки шаҳри Ҳамои Сурияро аз дасти нерӯҳои Башшор озод карданд.
Идораи амалиёти низомии мухолифони Башшор Асад, раисҷумҳури худкомаи Сурия эълон карданд, пас аз 72 соати задухӯрд бо нерӯҳои артиши ин кишвар шаҳри Ҳаморо пурра ба тасарруфи худ дароварданд.
Нерӯҳои мухолифин мегӯянд, пас аз тасарруфи шаҳри Ҳамо 3 ҳазор зиндониро, ки хеле дар як шароити вазнин нигаҳдорӣ мешуданд, аз зиндонҳо бидуни ҳеч қайду шарте озод карданд. Гуфта мешавад, соате пас аз вуруд ба Ҳамо нерӯҳои мухолифин ба сӯи шаҳри Ҳимс ҳаракат карданд.
То ҳангоми омодашавии ин матлаб аллакай нерӯҳои мухолифин ба наздикии шаҳри Ҳимс расидаанд ва онҳо талош доранд то суқути Башшор Асад аз қудрат муборизаро идома бидиҳанд.
Ҳамзамон Идораи амалиёти низомӣ бо нашри эълонҳо аз артиши Башшор хостаанд, ки ҳарки аз ин низоми диктотурӣ ҷудо шудан ва ба онҳо пайвастан хоҳад, ҷонаш дар амон аст.
Аммо аз теъдоди кушта ва захмӣ шудагони ду тараф то ҳол оморҳои дақиқе мунташир нашудааст.
Гуфта мешавад, айни замон кишварҳои ҳамося, аз ҷумла Эрону Ироқ талош доранд бо роҳии гуфтушунид вазъро дар Сурия ором кунанд ва нагузоранд низоми Башшор Асад суқуқт кунад.
Аммо вазъ дар Ғазза ҳар лаҳза вазнинтар мешавад. Ҳуҷумҳои Исроил ҳамоно ба шиддат идома дорад. Субҳи имрӯз дар чанд ҳамлаи паёпайи Исроил ба хонаҳои сокионон дар Ғазза беш аз 30 нафар кушта шуда, даҳҳо нафари дигар захмӣ шуданд.
Ба иттилои расонаҳо, нерӯҳои артиши Исроил ҳатто беморхонаи Камоли Удвон, ягона беморхонае, ки дар шимоли Ғазза фаъолият мекард, аз кор боз мондааст. Дар наворҳо дида мешавад, ки нерӯҳои Исроил мошинҳои ёрии таъҷилиро дар назди ин беморхона тирборон мекунанд ва намегузоранд, захмиён вориди беморхона карда шаванд.
Гуфта мешавад, то кунун дар бомборонҳои Исроил болои мардуми Ғазза бештар аз 44 ҳазору 600 нафар кушта шуда, беш аз 105 ҳазор каси дигар захмӣ шудаанд. Гуфта мешавад, ҳатто беморон даво пайдо намекунанд, ки захмҳои худро мудово кунанд ва вазъи саломатии аксари онҳо хеле бад аст.
Ҳамчунин кишварҳо ва ниҳодҳои ҳуқуқӣ мегӯянд, вазъи инсонӣ дар Ғазза бисёр вахим аст. Аз як сӯ Исроил монеи вуруди кумакҳои ғизоӣ мешавад ва аз сӯи дигар бетаваққуф урдугоҳҳои паноҳандагон ва беморхонаҳоро бомборон дорад, ки ин вазъияти фоҷиаи инсониро дар Ғазза ба вуҷуд овардааст.
