Аз рӯзи эълони маъракаи эмгузаронии аҳолии Тоҷикистон то рӯзи 27 июн 205 ҳазор 619 нафар воксини зидди COVID-19 заданд. Дар ин бора Вазорати тандурустӣ ва ҳифзи иҷтимоии аҳолии Тоҷикистон хабар дод.
Тибқи маълумоти Вазорати тандурустии кишвар, аз ин шумор 18 ҳазору 29 нафар марҳилаи дуввуми воксинро низ гирифтаанд.
Ёдовар мешавем, ки пас аз хабар додани пизишкону сокинон аз вуҷуди коронавирус ва навиштани расонаҳо, рӯзи 21 июн Ситоди ҷумҳуриявӣ оид ба пешгирӣ аз паҳншавии бемории COVID-19 эътироф кард, ки дар Тоҷикистон мавҷи дигарбораи ин беморӣ хуруҷ кардааст. Дар пайи он рӯзи 24 июн Вазорати тандурустии кишвар дар шаҳри Душанбе маъракаи эмгузаронии густардаи сокинони аз 18-сола болоро эълон кард.
Пеш аз эълони маъракаи эмгузаронии умумии сокинон дар марҳилаи аввал, ки аз 23 моҳи марти соли ҷорӣ оғоз ёфт, пеш аз ҳама кормандони соҳаи беҳдоштӣ, соҳаи маориф ва илм ва шахсони аз 60- сола бар зидди бемории коронавирус эмгузаронӣ мешуданд.
Тоҷикистон то имрӯз аз ду воксинаи зидди коронавирус истифода мекунад. Ҳукумати кишвар моҳи марти соли ҷорӣ дар чорчӯби барномаи Созмони ҷаҳонии беҳдошти (COVAX) 192 ҳазор воксини “AstraZeneca” ва аввали моҳи июн 300 ҳазор воксини “CoronaVac”-и чинӣ дастрас кардааст.
Ваксинаҳои бар зидди COVID-19 ба кишвар ройгон, ҳамчун кумаки башардӯстона оварда шуданд.
Қаблан Бонки осиёии рушд барои хариди 3,4 миллион воя воксинаи зидди коронавирус ба Тоҷикистон аз ҷудо кардани 25 миллион доллар маблағи грантӣ хабар дода буд.
