1-уми декабри соли ҷорӣ дар шаҳри Женева Иҷлосияи 16-уми Созмони Милали Муттаҳид дар масъалаи ақаллиятҳо баргузор гардид.
Дар ин нишаст Аслиддин Шерзамонов, фаъоли мадании Бадахшон аз СММ хост, ки барои таҳқиқи рафтори нерӯҳои амниятии Тоҷикистон дар ҳодисаҳои солҳои 2021 ва 2022 дар Вилояти Мухтори Кӯҳистони Бадахшон, кумисюни байнулмилалии мустақил таъсис диҳанд.
Ин фаъоли зодаи Бадахшон гуфт, ки дар ҳодисаҳои хунини Роштқалъа, Хоруғ ва Рӯшон беш аз сад кас маҷруҳ шуда, даҳҳо нафари дигар кушта шудаанд.
Инчунин ӯ таъкид кард, ки беш аз ду ҳазор зодаи Бадахшон дар хориҷ аз кишвар паноҷҳӯ ҳастанд, аммо даҳҳо нафари дигар дар Тоҷикистону Русия дастгир ва дар мурофиаҳои паси дарҳои баста ба муддати дурудароз равонаи зиндон гардиданд.
Аслиддин Шерзамонов зимни суханронияш гуфт, ки дар миёни боздоштшудаҳо ҳомиёни ҳуқуқи башар, фаъолон, пешвоёни ҷомеаи маданӣ ва рӯзноманигорон низ ҳастанд.
Шерзамонов мегӯяд, ки помириҳо аз соли 2008 зери саркӯб монда, кушторҳо таҳқиқ нашудаанд ва боздоштшудаҳо аз муносибати бераҳмона азият мекашанд.
Ба гуфтаи ин фаъоли помирӣ, ҷомеаи шаҳрвандии як замон фаъоли ВМКБ ҳоло дар банди тарсу ҳарос монда, наметавонад дар бораи қонуншикании мақомот гузориш диҳад, чун зиёда аз 200 созмони ғайридавлатӣ, ки дар пайванд ба ҳуқуқи инсон, баробарии ҷинсӣ, таҳсил ва тавонмандсозии иқтисод кор мекарданд, маҷбур баста шуданд.
Дар охир Аслиддин Шерзамонов раҳоии фаврӣ ва беқайду шарти пешвоёни ҷомеаи шаҳрвандӣ, рушди иқтисодии ВМКБ ва эътирофи расмии помириҳо ҳамчун ақаллияти мустақил бо ҳуқуқу озодии комил талаб кард.
Ёдовар мешавем, ки мақомоти Тоҷикистон бо баҳонаи “мубориза бо ҷинояткорӣ” дар соли 2021 дар Роштқалъаву Хоруғ се кас ва дар Рӯшону Хоруғ дар соли 2022 камаш 34 сокини маҳаллиро ба қатл расонданд.
Эмомалӣ Раҳмон зимни суханроние мардуми бегуноҳро узви гурӯҳҳои ҷиноӣ номид ва тасдиқ кард, ки фармони амалиётро шахсан худи ӯ додааст.
Дар ҳоле мақомот, фаъолони боздоштшуда ва кушташудаи помириро ҷинояткор меномад, ки наздиконашон мегӯянд, ки ин афрод силоҳ надоштанд ва танҳо барои ибрози андеша ва эътироз ба кӯчаҳо баромада буданд.
Инчунин борҳо созмонҳои ҳомии ҳуқуқ ва кишварҳои ғарбӣ мақомоти Тоҷикистонро барои бархурд бо помириҳо танқид карда, озодии беқайду шарти фаъолони боздоштшударо аз зиндон ва таҳқиқи рафтори нерӯҳои амниятиву ба ҷавобгарӣ кашидани онҳоро талаб карда буданд.
