Идигул Қосимзода, вакили парлумони Тоҷикистон ва собиқ раиси Кумитаи занони кишвар имрӯз 22 июл бар асари бемории COVID-19 дар синни 53-солагӣ даргузашт. Дар бораи марги ӯ дар шабакаҳои иҷтимоӣ корбарон хабар доданд.
То ҳол на дафтари матбуоти Маҷлиси намояндагон ва на ниҳодҳои расмии кишвар дар мавриди марги ӯ чизе нашр накардаанд.
Радиои Озодӣ аз қавли як масъули бемористони “Якум Советский”-и шаҳри Душанбе навишт, ки сабаби марги ӯ гирифтор шудан ба бемории коронавирус будааст.
Бино ба иттилои манбаъ, чаҳорро рӯз пеш наздикони Идигул Қосимзода ӯро бо нишонаҳои коронавирус дар ҳолати вазнин ба беморхона бурданд. Пизишк гуфта, ки номбурда дар хона табобат мегирифтааст, аммо пас аз бад шудани ҳолаташ ӯро ба бемористон оварданд. “Дар зери дастгоҳи нафасдиҳии сунъӣ гузоштем. Хеле талош кардем, аммо наҷот дода натавонистем. Вирус шушашонро тамом карда буд”, – афзудаст мусоҳиби Озодӣ.
Манбаъ қайд мекунад, ки Қосимзода дар қатори дигар намояндагони Парлумон воксин гирифта буд.
Идигул Қосимзода 4 январи соли 1968 дар ноҳияи Вахш ба дунё омадааст. Ӯ хатмкардаи Донишкадаи омӯзгории шаҳри Бохтар (собиқ Қӯрғонтеппа) буда, дар мақомҳои гуногун кор кардааст.
Қосимзода аз ибтидои солҳои ҷанги шаҳрвандӣ то соли 2003 омӯзгори мактаби таҳсилоти умумии №51-и ноҳияи Вахш буд. Аз соли 2003 то соли 2006 дар Донишкадаи давлатии забонҳои Тоҷикистонба номи Сотим Улуғзода ба ҳайси муаллимаи забони русӣ кор кардааст. Солҳои 2008-2015- Муовини ректор оид ба тарбияи Донишкадаи мазкур буд ва аз соли 2017 то 2020 Раиси Кумитаи кор бо занон ва оилаи назди Ҳукумати Ҷумҳурии Тоҷикистон кор кардааст. Аз 1 марти соли 2020 то дами марг вакили Маҷлиси намояндагони Маҷлиси Олии Ҷумҳурии Тоҷикистон интихоб шуда буд.
Идигул Қосимзода бештар дар мавзӯҳои ҳассос, ба хусус ҳиҷоби занон дар расонаҳо ном бароварда буд. Ӯ ин кори худро “фаҳмондадиҳии занон”, “ташвиқи либоси миллӣ” ва “мубориза бо либоси бегонагон” унвон мекард, аммо рафтораш борҳо дар ҷомеаи тоҷик, ба хусус дар шабкаҳои иҷтимоӣ баҳсҳои зиёдеро ба бор оварда буд.
