Садҳо мусофир аз Тоҷикистон, ки барои парвоз ба шаҳрҳои гуногуни Русия аз ширкати ҳавопаймоии “Северный ветер” чипта харидаанд, дар фурудгоҳи Душанбе ва Хуҷанд дармондаанд. Ин мусофирон як ҳафта боз наметавонанд ба Русия парвоз кунанд.
Ба иддаои раҳбари намояндагии ширкати “Северный ветер” дар Тоҷикистон, Мироҷ Азизов, сабаби банд мондани мусофирон дар он аст, ки Ожонсии авиатсияи граждании назди Ҳукумати Тоҷикистон ба ширкати онҳо иҷозаи парвоз надодааст.
Масъулони ин Ожонсӣ то ҳол дар ин бора чизе нагуфтаанд ва ба тамосҳои телефонии Радиои Озодӣ посух надоданд.
Як манбаъ аз фурудгоҳи Душанбе ба Радиои Озодӣ гуфта, ки Ожонсии авиатсияи гражданӣ ба “Северный ветер” иҷозат надод, ки бо ҳавопаймоҳои бузург мусофир баранд.
Ин дар ҳолест, ки Мироҷ Азизов мегӯяд, ба ширкати онҳо барои бо чунин ҳавопаймоҳо бурдани мусофирон ду бор иҷозаи парвоз доданд, вале рӯзи 12-уми май иҷозатномаи онҳоро бекор карданд.
Азизов дар идома қайд намуда, ки давоми як моҳи ахир ба беш аз ду ҳазор нафар чиптаи парвоз ба шаҳрҳои гуногуни Русияро фурӯхтаанд.
“Дар аввал онҳо худашон гуфтанд, ки ҳавопаймои бузургтар биёред, ки мусофир зиёд аст. Вақте иҷозат доданду мо чиптаҳоро фурӯхтем, иҷозатномаи моро бекор карданд. Агар барои фурудгоҳ мувофиқ намебуд, дубор моро бо чунин ҳавопаймо қабул намекарданд. Чун мусофир зиёд буд, ба хотири сардаргум нашудан мо ҳавопаймое овардем, ки ғунҷоиши 440 мусофирро дорад.” – гуфт ӯ.
Ба иддаои масъулони ширкат мегӯяд бо як талаби Оҷонсии авиатсияи граждании назди ҳукуматнархи чиптаҳоро поин бурдаанд ва ҳоло ширкати “Северный ветер” вобаста ба шаҳрҳо чипатаи онҳо аз 3 ҳазор сомонӣ то 8,5 ҳазор сомонӣ нарх дорад.
Ин ширкат аз шаҳри Хуҷанд ба Қазон, Иркутск, Перм ва аз Душанбе ба Санкт-Петербург, Қазон, Маскав бояд парвоз анҷом диҳад.
Бештари мусофироне, ки аз ин ширкат чипта харидаанд бояд шаби 11-12 уми май ба Русия парвоз мекардаанд. Ин мусофирон мегӯянд, як ҳафта боз дар фурудгоҳҳо қарор доранд ва аз интизорӣ хаста шудаанд.
Мусофирон аз он шикоят доранд, ки масъулон давоми 1 ҳафта мешавад ваъдаи парвозро дода истодаанд ва онҳо ҳар маблағе доштаанд, хӯрок харида хӯрдаанду ду бор барои КОВИД-19 ташхис супоридаанд ва пули ҳама тамом шудааст. Ин мусофирон мегӯянд, ки ба доди онҳо касе намерасад.
Моҳи марти соли гузашта парвозҳо аз Тоҷикистон ба Русия ба хотири ҷилавгирӣ аз паҳншавии коронавирус маҳдуд шуда буд. Бо гузашти як сол пас аз 1-уми апрел дубора иҷозаи парвоз ба Русия дода шуд.
Пештар муҳоҷирон аз нархи гарони чипта ва камбуди он низ шикоят доштанд.
