Мавсими даъвати тирамоҳии ҷавонон ба хидмати ҳарбӣ дар Тоҷикистон пурра ба анҷом расидааст. Дар ин бора Вазорати дифои кишвар хабар дод.
Вазорати дифои Тоҷикистон иттилоъ медиҳад, ки дар рӯзҳои аввали даъват Вилояти Мухтори Кӯҳистони Бадахшон нақшаро пурра иҷро карда, инчунин шаҳри Душанбе, шаҳру ноҳияҳои тобеи ҷумҳурӣ ва вилоятҳои Хатлону Суғд аз иҷрои пурраи нақшаи даъват гузориш доданд.
Дар хабари вазорат гуфта шудааст, ки агарчи нақша пурра дар вақташ иҷро шуда бошад ҳам, аммо тибқи моддаи 28-и Қонуни Ҷумҳурии Тоҷикистон “Дар бораи ӯҳдадории ҳарбӣ ва хидмати ҳарбӣ” ҷавонон барои омӯзиш ва омодагӣ ба хидмат ба комиссариатҳои ҳарбии маҳалли истиқомат даъват карда мешаванд.
Инчунин Вазорати дифоъ аз мақомот ва ҷавонону волидоне, ки дар ин давра фарзандонашонро ихтиёрӣ ба артиш фиристодаанд, изҳори сиппосу миннатдорӣ кардааст.
Пештар Вазорати дифоъ аз зиёд шудани шумораи ҷавонони ихтиёрӣ ва дар сари вақт иҷро шудани нақшаи даъват гуфта, онро ба корҳои фаҳмондадиҳии комиссияҳои даъватӣ рабт дода буд. Аммо шикояти сокинон ба расонаҳо акси гуфтаҳои вазоратро нишон дода, гуфта мешавад, ки сафи ҷавононе, ки ба артиш мераванд, кам шуда истодааст.
Ҳатто имсол хабарҳо нашр шуд, ки дар аксари ҷамоату деҳоти Тоҷикистон масъулони комиссариятҳои ҳарбӣ дар ҳамдастӣ бо дигар мақомот барқро аз мардум қатъ карда, талаб карданд, ки ба онҳо сарбоз биёранд ва ё онҳое, ки дар муҳоҷиратанд барганд ва дар сафи артиши кишвар хидмат кунанд, дар акси ҳол ба онҳо барқ дода намешавад.
Шароити адои хидмат дар артиши Тоҷикистон хеле бад арзёбӣ мешавад. Яке аз сабабҳои гурезон шудани ҷавонон ин бадрафторӣ бо сарбозон ва ҳатто кушта шудани ҷавонон бар асари лату кӯб дар қимсҳои низомии кишвар гуфта мешавад.
Мақомот барои рафъи мушкилот чора наандешида, балки онро инкор мекунад ва барои пур кардани сафи артиши кишвар аз усули “облава” ё ҳамон сарбозшикор истифода мебаранд.
